La Xunta d'Escritores Asturianos falará de nacionalismu y lliteratura

La Xunta d’Escritores Asturianos 2010 falará del nacionalismu asturianu y de les relaciones ente la lliteratura, la identidá y la nación nel casu asturianu. Asina, les diverses ponencies contemplarán cómo los aspectos identitarios afecten al fechu d'escribir nuna llingua minorizada y non oficial como l'asturiana frente a otres de más prestixu institucional.

Según señalen dende la organización, la relación ente nación y lliteratura ye un vieyu tema presente en tola historiografía lliteraria y paña especial relieve nel casu de les lliteratures de llingües menores y en procesu de construcción como ye’l casu de la lliteratura asturiana, que ta escrita nun llingua inda non oficial.
 
Tamién va tratase na Xunta los medios pa superar cola lliteratura esta situación de desventaya, asina como les relaciones esistentes ente identidá y lliteratura, cara al futuru de los nuevos escritores, ente otros temes.
 
Les actividaes tán destinaes tanto a escritores como al públicu en xeneral yá que l’asistencia ye gratuíta y consisten nun ciclu de conferencies, debates, alderiques, presentaciones de llibros, amás tolos asistentes recibirán como regalu reproducciones de mapes históricos d’Asturies. Esta edición del 2010 quier recordar tamién los centenarios de Fruela II y del arquitectu asturianu Miguel de la Guardia.
 
La Xunta d’Escritores Asturianos tendrá llugar ente’l día 11 y 13 de xineru n’Uviéu nel palaciu de Villa Madalena, situáu nel antigu Paséu de la Siella del Rei.
 
LLUNES 11 XINERU:

- 17h. Presentación del llibru Lliteratura asturiana y compromisu, actes de la Xunta d’Escritores Asturianos 2008. Presenta: Esther Prieto.
- 17,30h. Llingües, clases y nacionalismos. Javier Cubero.
- 18,30h. L’idioma asturianu na Asturias de Santiyana. Xaviel Vilareyo.
- 19,30h. Presentación de los númberos 4 y 5 de la revista N’AST. Daniel Cueli.
- 20,30h. Centenariu de Miguel de la Guardia (Hontaneda 1859 – Uviéu 1910), arquitectu de Villa Madalena.

MARTES 12 XINERU:

- 17h. De cómo una llingua s’enfrenta a la muerte. Pablo Martínez Testa.
- 17,30h. Nación y llingua. Helena Trexu.
- 18h. Presentación del llibru Abismos, adicciones y papeles azules, de Xuan Carlos Crespos.
- 18,30h. Crónica del rei Fruela II d’Asturies (910-925) Xaviel Vilareyo.
- 19h. El procesu creativu. Dorita García. Presentación de la so obra narrativa.
- 19,30h. Presentación del númb. 6 de la revista Formientu.
Inaciu Galán, Laura Marcos, Benxa Pérez y César García.
- 20h. Recital de nueva poesía asturiana.

MIÉRCOLES 13 XINERU:

- 17h. Presentación del númberu 72 de la revista LA SIDRA. Llucía Fernández Marqués.
- 17,30. La lliteratura dialectal de los escritores de Santiyana. Xaviel Vilareyo.
- 18,30. El periodismu nuna llingua minorizada. Inaciu Galán.
- 19,30. Antoloxía poética de la Xeneración del Compromisu (1967-1982)
- 20h. Presentación del llibru Historia del Cine Asturianu, de Xaviel Vilareyo.
Presenta: Marcos Abel Fernández.