Carlos X. Blanco; “Valledor comprometióse más cola llingua que’l propiu Bloque”

Carlos X. Blanco (Xixón, 1966) ye Doctor en Filosofía y Llicenciáu en Psicoloxía y Pedagoxía pola Universidá d´Uviéu. Anguaño ye profesor de filosofía en Ciudá Real. Asoleyó dellos capítulos en llibros académicos como “Compendio de Epistemología” y “Diccionario Crítico de Ciencias Sociales”, de Román Reyes. Ye tamién autor d’artículos y ensayos, como “La Nación Asturiana. Anguaño, ye ún de los miembros de l’asociación “Pola Xuntanza”, una asociación que pide la unidá del nacionalismu asturianu al traviés d’una web. Asturies.com falo con él de los exotivos de la organización, de la situación del asturianismu políticu y de l’actualidá política en xeneral.

¿Qué ye l’Asociación pola Xuntanza?

Nosotros somos un aconceyamientu ciudadanu, de persones particulares, qu’usamos internet como ferramienta fundamental pal alderique seriu y educáu d’idees y soluciones y ser quien a algamar una xuntanza del nacionalismu asturianu. Dende la primavera d’esti añu, Ricardo Candás y yo mesmu tuvimos la idea de llanzar una web onde dir colgando noticies de les dos fuerces nacionalistes d’esquierda que por afinidá ideolóxica podíen dir xuntes nuna mesma organización. Al poco axuntóse otra persona, Adrián, siendo tres les persones que tamos tres les tares d'alministración. Pensábemos, de mano, que’l qu’Andecha Astur y UNA fueran por separao yera mui perxudicial y confusu pal electoráu y pal potencial simpatizante del nacionalismu asturianu d´esquierda. La ruindá de los resultaos electorales y el trescalar d’un mensaxe soberanista o asturianista d’esquierda taben, baxo’l nuestru análisis, severamente comprometíos al dir estos dos grupos por separao. A ello amestamos una riestra d´artículos d´opinión, propios o de persones y blogues que s’identificaron con nuestru enfotu.

Alcontrámonos, poro, col fechu de qu´había bayura de xente que tenía un mesmu planteamientu y que mos dixeron que’l llabor de la web yera perbonu y constructivu, y que nel foru de la mesma podíen facese discutinios que n´otros ámbitos nun se daben. Hasta 16 blogues sofitaron el nuestru enfotu de pidir la xuntanza del nacionalismu asturianu, y dellos particulares, con grau estremáu de compromisu con nós, tiénennos escritos mensaxes d´apoyu o artículos, y amás collaboren dacuando con correos internos, que ye una posibilidá qu´abrimos a la xente va pocu. Quiciás somos pocos pa un país d’un millón d´almes, pero nun importa, yá que nun somos un partíu nin una asociación qu’haya de midise numbéricamente. Los númberos cuntarán nes votaciones namás. Nin siquier queremos ser una asociación formalmente establecida, con presidentes, secretarios y demás. Sólo queremos ser un instrumentu pa la unión de los asturianos y pal rescate del nuestru país. Apurrimos opiniones, noticies, entamos ideolóxicos, tolo necesario pa visibilizar que n´Asturies, anque feble, hai un nacionalismu políticu, y hai trabayu soberanista y asturianista que se debía amestar.
 
¿Tien pensáu xuntase colos partíos pa tresmitir el so mensaxe?
 
Como web mandemos el mensaxe col convite a estes dos fuerces d´izquierda, asina como a dellos medios dixitales y escritos del mundu asturianista y nacionalista. Nunca dexamos pa prau convertir esta mediación per aciu d’internet nun conceyu cara a cara, nuna especie de Plataforma o Asociación formalmente fecha, pa ver si algamamos la xuntanza que buscamos, pero a fecha de güei nun dimos esi pasu, esi gran reblagu que supondría falar cara a cara, como plantegues, con partíos y coaliciones. Sicasí, consideramos el nuestru intentu web como una posible simiente pa esa Plataforma o Asociación.
 
¿Ye posible anguaño la unidá del asturianismu políticu?, ¿cómo se podría articular un partíu onde entraran independentistes d’esquierdes y rexonalistes de dreches?
 
Tamos convencíos de qu’esa unidá ye posible. Necesitamos un gran partíu o confederación de fuerces que coincidan colo de la Oficialidá y l ´Autogobiernu. Los vieyos discutinios ideolóxicos qu’estremen ente izquierdes y dereches o centru yá nun son tan interesantes pa nós, nun son nada énte enfotos como’l defender la oficialidá de la llingua asturiana y los demás elementos de la nuestra identidá que mos afalen a proclamar Asturies como nación dafechu, y poro, merecedora del máximu autogobiernu, dos conseñes mui básiques onde creo que cabemos bien de xente. Si empezamos con bizantinismos nun vamos a llegar a nada. ¿Qué ye ser independentista güei n´Asturies cola base social que sabemos qu´hai pa esi movimientu? Si n´Euskalherria y Cataluña inda son minoría, imaxínate güei n´Asturies. Y lo de ser rexonalista, ye cosa tamién mui relativa. Antes de la nomada Guerra Civil, lo qu´anguaño nomamos nacionalismu entós recibía´l títulu de rexonalismu. Y diéronse rexonalismos que yá quixéramos ver espoxigaos n´Asturies, defendiendo la llingua propia del país y un encaxe del mesmu nun estáu plurinacional. Tovía anguaño hai demandes polítiques que pa la mayoría de los asturianos suenen a cosa de marcianos, a cosa radical y por embargu podíen ser entendíes como rexonalistes: mayor autonomía pa una nacionalidá dafechu como la d´Asturies y un réxime de billingüismu real col asturianu en pie d’igualdá col castellanu. ¿Ye eso ser radical?. N´otros países ibéricos ye ser rexonalista afirmando que coses tales entren na Constitución vixente. Y por embargu, yá quixéramos dalgunos un rexonalismu talu.
 
¿Qué te paez la dimisión de Valledor?
 
Yo valoro d’una manera mui positiva esta dimisión. Yá dexemos clara na nuestra web la opinión de qu’esti xestu lu honra como políticu. Lo que llamento ye que nun lo fixera antes. Nun yera coherente siguir nin siquieramente un momentu más dientro d’un barcu que siempre navegó nuna dirección defechu contraria a la llingua y a la identidá nacional d´Asturies. Y mira que trataron d´engatusar a un mundín asturianista despistáu, per aciu d’abondo aparato mediáticu, artísticu, editorial, etc. Pero cualquier persona intelixente sabe que n’IU hai fuertes tendencies centraliegues y anti-asturianes, tantu o más que nel PSOE, y que son éstes les que s’imponen. El barcu nomáu IU agora ta a piques de naufragar, magar que sía selemente. Too n’Asturies ye mui aselao, y hai una inercia d’esquierdismu inocente y serondiegu nel electoráu d’equí, que ye tremenda. Un izquierdismu falsu, porque lo que siempre buscó foi un pucheru caliente n’alministración.
 
Valledor, a nivel personal, sí que se comprometió abondo más cola llingua, más, creo, que’l propiu Bloque, y quiero pensar que ye una persona que tien más claro l’apueste por un Estáu plurinacional. Yo recuerdo que yera de los pocos que contestaba arrechu a les rémores de "sensatos y pensantes" qu’inda queden n´Asturies, ye decir, a los Gustavos Buenos y demás miembros de la Güestia Anti-Bable, cuando munchos otros azorraben. Pero orgánicamente nun sé aú ta l’asturianismu de la so formación. Una pena que’l Sr. Valledor nun tuviere a bien falar colos nacionalistes asturianos, o cola mesma plataforma Pola Xuntanza, tamién, pa poder aclarar los sos "amagos" de refundación d´una Esquierda Asturianista. Agora nun sé ónde quedarán eses idees suyes.
 
¿Qué te paez Roberto Colunga?, ¿podemos dicir que hai un diputáu nacionalista d'esquierdes na Xunta Xeneral?
 
Yo nun veo nacionalismu nel Bloque por Asturies nin siquiera en pintura, a fecha de güei. Veo los pucheros calientes, repito. Pero quiero dexar clara una cosa. Yo y otros buscamos sinceramente una Xuntanza abierta, especialmente na nueva etapa qu’abrimos va pocu, abierta tamién a ellos. Si’l Bloque emprima a actuar como una fuerza independiente, si s’avera al restu de los nacionalistes asturianos y abandona la so vida cortesana, a la solombra d’IU y del PSOE, teníemos toos qu’abrir los brazos a un partíu asina, que sería bienllegáu a la hora de reconstruir Asturies. Hasta güei yo siempre nomara al BpA "el Bloque pol Engañu", pero oxalá agora l’engañáu sía yo y vea n’ellos un nacionalismu asturianu y una vida independiente n’esi partíu, demostráu colos fechos. Va depender d’ellos, de lo que faigan nel futuro. Nun hai qu’escluyir a naide na Xuntanza.
 
¿Entra IU dientro d’esa xuntanza?. Nómense asturianistes y tán pola oficialidá y l’autogobiernu.
 
Mira, yo mesmu dirixí va unes selmanes una carta abierta al Sr. Valledor, que tol mundu que quixo pudo lleer n´internet. Ellí yo quería abrir la puerta a la oportunidá de que’l Sr. Valledor aldericara colos nacionalistes y non cola so “marca de fábrica”, el Bloque por Asturies. Si él quería construyir esa alternativa asturianista (oficialidá y autogobiernu) que lo faiga yá d’una vez, que nun amague. Pero que sepa que solu nun va a ser quien. Solu y col BpA que ye la versión dos d’IU, la cuala ta siendo la versión dos de la FSA a efeutos práuticos. Si una parte d’IU quier xugar esa baza asturianista daveres, y nós tenemos les nuestres duldes, va ser de mano del Sr. Valledor, pero esta persona nun s’interesó pola Xuntanza, nun s’interesó pola mio carta (que tenía crítiques, pero tamién un convite). En fin, que los amagos asturianistes d’IU son conatos d’autobombu y folclorismu, pa siguir remanando una parte del votu despistáu d´asturianistes sinceros de la banda izquierda. Pero creo que’l cuentu nun-y va durar muncho. Traicionaron bien de veces les sos “premises irrenunciables”.
 
Dicía Arias va tiempu nuna entrevista que facia falta un partíu moderáu no social y radical no asturiano, ¿ye esa tamién la idea de l’asociación?
 
Lo que diz el profesor Arias ye de bon xacíu inda a los oyíos de los que, a nivel particular, como yo, somos d´un tueru revolucionariu y un corazón soberanista. Una Xuntanza amplia diba a sirvir pa que los militantes más radicales d’esquierda s’averaren más a la realidá social d´Asturies, que nun va a volver a conocer un Ochobre del 34 nin tampoco va algamar calces d´espresión alloriantemente batasunos, gracies a los dioses. Pero igualmente podía dicise que los supuestos “rexonalistes” más de centru y derecha sían quien a contaxase de la brenga reivindicativa de la esquierda nacionaliega, ensin perder el realismu. El realismu que nos pon delantre d´una sociedá asturiana que sigue siendo mayormente españolista o indiferente. De verdá creo que d´esa xuntanza vamos a ganar toos.
 
¿Tien l’asturianismu políticu anguaño dalguna cabeza visible?, ¿quién podría encabezar la unidá del asturianismu políticu?
 
Nun sabría dar un nome. Pienso qu´había que pensar nun par de cabezaleros de cada partíu yá esistente, y que despierten consensu, amás d'una docena de persones ensin carné, de la sociedá civil asturiana, y ente toos aconceyar un manifiestu, una plataforma, nun sé, dalgo que podía volver a ilusionar a una masa desmovilizada. Eses doce o venti persones perconocíes y respetables por una mayoría diben poder dar muncho sofitu a una idea como la nuestra.
 
Según les encuestes Asturies ye una de les CCAA del Estáu onde más sentimientu identitariu hai, ¿por qué esto nun s’espeya a la hora de votar?
 
El desplicalo diba enllenar llibros enteros. Nun ye pa dicilo en cuatro palabres. Tol mundu sabe cuánto mancó na conciencia popular y na de les élites el mitu Covadongista y demás robos simbólicos de la nuestra historia como país. Quiciás, más de recién, los problemes económicos nuestros demientres la transición y una ideoloxía que nun tien por qué ser la única de la izquierda, l´obrerismu, llantó na conciencia del pueblu unes prioridaes y un falsu progresismu “internacionalista” que capó lo identitariu. A Beiras en Galicia, o a Gil de San Vicente, n´Euskalherria, nun-y discute naide lo de ser marxistes y amás nacionalistes o independentistes. Equí discútentelo porque´l PCE y el PSOE creénse col monopoliu de lo que ye “socialismu”, “progresismu” etc. y pa encima contrapónenlo a lo identitario. Siguen pensando que lo del bable va colo folklórico, y claro, con mentes tan perezoses hai pocu que facer. La identidá nacional d´Asturies ye cosa de toos.
 
¿Ye nos conceyos onde hai qu’entamar a trabayar?
 
Una de les contribuciones más interesantes que surdieron del nuestru foru foi l’apueste por pañar puestos y visibilidá nos Conceyos. Conquistar cuotes de presencia ellí onde la nación vívese día a día y cerca de la xente. Hai que tener páxaru en mano. Nun hai que pensar que por xuntase tres o cuatro partidinos yá se va meter un nacionalista na Xunta y yá ta too iguao. Non. Si nun mos damos a conocer a la sociedá en xeneral como persones útiles y normales, escomenzando pol nuestru propiu pueblu o barriu, vamos daos.
 
¿Supo tresmitir l’asturianismu político’l so mensaxe a la sociedá, a otros colectivos?
 
Hai bien de xente nos movimientos ciudadanos y sociales qu’abluquen al ver a “asturianistes” discutir coses muncho académiques, como que la isoglosa tala llega hasta equí o hasta acá. Importantes, pero pa la Universidá, non pa salvar a Asturies de la estroza actual. Hai xente asturiano normal qu’abluca col “cultismu” de dellos figurones que piensen que con poemes, pallabres rares y llibros subvencionaos yá se construí un país. Non. Les causes pendientes de la humanidá concrétense en cada nación y cola llingua d’esa nación como preséu hai que dir a la llucha y a la igua de problemes comunes.
 
Si miramos p’atrás vemos, qu’anque poco, l’asturianismu cultural si “trunfu”. Anguaño anque los gobernantes faigan poco o nada pola llingua públicamente puen dicir que nun tán pola oficialidá, pero non que nun tán pola promoción del idioma. ¿Por qué esto nun pasa col asturianismu políticu?, ¿por qué los partíos mayoritarios nun garren un discursu asturianista?
 
Personalmente yo creo que los partíos mayoritarios sucursalizaos nel país nun faen otro que siguir les direitrices que-yos marquen dende Madrid. Por eso necesitamos una Xuntanza de fuerces dafechu asturianes, pa llanzar un misil na llínea de flotación d’esti réxime monolíticu, clientelista, corruptu y que caltién a Asturies totalmente neutralizada. Equí pudo haber una “cuarta nacionalidá histórica” por razones oxetives, anque la conciencia asturianista taba mui poco desendolcada sacantes lo de Conceyu Bable. Pero quixeron provocar un albuertu al nacionalismu asturianu, nun dexalu nacer nin siquieramente. Nun mos enfotamos un res del supuestu entrismu asturianista o enclín en pro de la llingua de los partíos españoles: PSOE, PP ya IU. Ellos sí que son anti-asturianos y pro-españoles sían d´esquierdes o de dereches. Y nós, tovía nun deprendemos d’ello
 
¿Foi la Coalición Asturiana un intentu perdíu pal nacionalismu asturianu?
 
Nun tengo una opinión definitiva sobre esi asuntu, nun m’atrevo a opinar ensin conocelu bien. Y quixera más mirar pal futuru.
 
¿Anguaño ta socialmente bien vistu ser asturianista no políticu?, ¿deberíen los asturianistes políticos d’a pie entamar a salir del armariu?
 
Munchos yá salimos del armariu. Los 10.000 que damos la Cara pola Oficialidá. Los munchos que desiximos autogobiernu non menor que’l de gallegos o vascos. Otra cosa ye poner el carru delantre los gües. Nun hai soberanía de la que falar si nun hai llingua oficial y complicidá de la sociedá civil pa col nuestru proyeutu. Faen falta más tribunes, menos censura, menos agresión ente collacios de viaxe. Enantes de la independencia o de lo que sía que quiera’l pueblu nun futuru, tenemos que facenos respetar, ser creyibles, dar ilusión. Agora´l nacionalismu asturianu nun da más que lleiciones vergoñoses d’engarradielles lloques y de cainismu ridículu. Caún paez que va al debalu, unu desixendo conquistar les Asturies de Santillana, otru falando de les tres o trenta llingües d’Asturies. Paez que perdimos la cabeza, mentes la xente queda nel paru, dan cuelmes a les muyeres o hai fracasu escolar. ¿Quién nos va tomar en seriu con esti panorama?
 
¿Qué esperáis que pase en 2011?, ¿dientro del movimientu asturianista nun hai un fuerte grau de cansanciu, de ver que nada va p’alantre no políticu?
 
Vamos a ser optimistes: va haber della xuntanza, anque sía parcial, y caún va quedar nel so sitiu. Va haber diputáu na Xunta per aciu d’esa xuntanza. Una persona de consensu productu del aconceyamientu d’esos diez o venti asturianos y asturianes tamién de consensu, que prometieron énte’l pueblu nun entrar en dinámiques d’agresión mutua ente collacios de viaxe y aliaos, y asina facer tolo posible por valtar esti réxime que nos ta matando como nación. Si eso asocede, ¿ú quedaría’l cansanciu?. Diba ser el riscar d’una nueva dómina.

Comparte...                                    

Enllaz permanente