Los vecinos de Xibares denuncien que la cantera y la cementera d'Aboño incumplen el plan de recuperación ambiental

L’Asociación de Vecinos de Xibares “El Tranqueru” presentó denuncia énte la Conseyería de Mediu Ambiente pol incumplimientu del plan de recuperación ambiental de la cantera de Sato y de la Cementera de Tudela Veguín, les dos n’Aboño. En nome de l'AAVV Javier Rubio Melgar, solicita a la Conseyería que tome les midíes oportunes.

Según “El Tranqueru”, los responsables de la cantera  y la cementera nun llevaron a cabu la plantación de vexetación que diba dir al empar del avance de la esplotación según se recoyía na Declaración d’Impactu Ambiental. Del mesmu mou que los taludes diben quedar escondíos por pantalles vexetales, utilizando especies del país.
 
L’asociación pide a la Conseyería, como órganu de control y vixilancia, que tome les midíes pa la integración de les instalaciones nel entornu y llegue a un alcuerdu pa minimizar los impactos nel paisaxe. Amás, señalen, tamién se tien que tener en cuenta otros parámetros como’l ruíu, contaminación… “que los ciudadanos nun puen denunciar yá que carecemos de los medios técnicos precisos pa fundamentalos”, señalen.