Entama la campaña de la consulta sobre la independencia de Cataluña

En quince díes 160 conceyos de Cataluña van preguntar a los sos ciudadanos pola independencia. Por mor d’ello, güei domingu, el Forum de Barcelona acoyó’l gran actu central de la Coordinadora de la Consulta pola Independencia, que cuntó con unos 3.500 asistentes y que daba entamu a la campaña. Uriel Beltran, diputáu d’ERC y representante de la Coordinadora, dixo que la campaña consistía n’informar a los 160 conceyos sobre los llugares onde va poder votase y les razones de la consulta, fomentando la participación y “non promoviendo’l votu nuna dirección o n’otra”.

Carlos Mora, alcalde d’Arenys de Munt y presidente del comité organizador del 13-A, pidió-y a los partíos catalanes que dean llibertá de votu a los sos diputaos pa qu'exerzan el so drechu nel Parlamentu llibres de los mandaos de les direcciones. Sicasí, afitó que si ye necesario, el comité llevará al Parlamentu más de medio millón de firmes pa que s’abra l’alderique sobre la independencia.
 
Per otru llau, el periodista Miguel Calçada, encargáu de presentar l’actu, dixo que tres el 13-A nun hai marcha atrás, “ye’l caberu pasu enantes de la independencia, el nome de la dignidá de Cataluña”. El próximu vienres once d’avientu, tendrá llugar en Vic l’actu de fin de campaña. Onde participará’l presidente del FC Barcelona, Joan Laporta, que fairá un llamáu a la participación
 
Manifiestu de sofitu
 
Esti yera l’actu que daba entamu a la campaña, pero’l pasáu xueves 26 de payares, presentábase en Barcelona un manifiestu de sofitu al referendum del 13-A. Ente les persones que lu apoyaben taben los actores Sergi López y Joel Joan, el filósofu Josep M. Terricabras o’l cocineru Santi Santamaría. El manifiestu ye un documentu cuatrillingüe catalán-castellán-francés-inglés que se va facer llegar a axentes políticos de dientro y fuera de Cataluña y que quier sumar sofitos de particulares y colectivos.