Consuelo Vega presenta l'Axenda Didáctica Escolar

Músicos y cantantes como Anabel Santiago, Chus Pedro (Nuberu), Toli Morilla o Xune (Dixebra), grupos de teatru como Quiquilimón, Kumen o Higiénico Papel, monologuistes como Milio'l del Nido, o escritores como Vicente García Olvia, ofrecerán actuaciones, talleres y charres a los estudiantes de Primaria y Secundaria de tolos centros educativos que lo soliciten.
Formen parte de l'Axenda Didáctica del Principáu, pal cursu escolar 2009-2010, que presentó güei en rueda prensa la directora xeneral de Política Llingüística, Consuelo Vega y el director xeneral de Polítiques Educatives, Juan José Sánchez Navarro, acompañaos en primer términu de la cantante Anabel Santiago, y la representante del grupu de teatru Producciones Quiquilimón, Rosa Garnacho.
Como yá adelantáremos nesti mediu, trátase d'un conxuntu d'actividaes que la Conseyería de Cultura ofrez a los centros pa fomentar la llingua y la cultura d'Asturies. Pudiendo los colexos ya institutos formalozar la so solicitú dende esti momentu y hasta finales del presente mes de payares pente medies d'un formulariu d'inscripción.
Será'l segundu añu en que s'entamen estes actividaes, que se desarrollen tanto n'asturianu como en fala. El pasáu añu tuvieron carácter esperimental y celebráronse en 40 centros de tola comunidá.
El Principáu destaca l'aumentu de los centros concertaos qu'ufierten llingua asturiana
D'otra manera al cabu de la rueda de prensa, y retrucando a les preguntes de los periodistes, la directora xeneral de Política Llingüística, Consuelo Vega, destacó l'aumentu de centros d'enseñanza concertada qu'ufierten l'asignatura de llingua asturiana nel nivel de primaria. En concreto, del 10,9% de les escueles que la incluyíen na so matrícula l'últimu cursu, pasóse al 18,1% nel actual.
 "Esti añu onde hai un saltu grande ye na concertada. Ye la que porcentalmente crez más, porque ye onde más pue crecer", esplicó, recalcando los datos mentaos. Na primaria pública, sicasí l'aumentu foi mínimu, del 90,4% al 90,6% de los centros, por mor, según la directora xeneral, de que'l campu de crecimientu ye muncho mas reducíu.
  Según Vega, "l'oxetivu ye siguir creciendo". Asina, anunció que según vaya averándose'l próximu periodu de matriculación intensificaránse les campañes pa siguir aumentando estes cifres.