Hugo Morán nun descarta ante ciudadanos y internautes penalizar l'usu del coche pa lluchar contra'l cambiu climáticu

El secretariu de Mediu Ambiente y Desarrollu Rural del PSOE, l'asturianu Hugo Morán, pidió güei que nun se descarte una posible penalización del usu del coche particular como una de les midíes pa lluchar contra'l cambiu climáticu. "Había que poner en marcha midíes que primen l'usu del tresporte públicu y nun descartemos que penalicen la utilización del vehículu priváu", dixo demientres un alcuentru sobre cambiu climáticu con ciudadanos y internautes pa celebrar el 'Blog Action Day'.
 
Amás, Morán alvirtió de que'l fechu de que s'apruebe una Llei de Movilidá Sostenible nun vaya evitar que la xente siga garrando'l coche, y insistió en que son necesaries "décades de trabayu y asunción de compromisu", anque insnistió en que "probablemente" nel vehículu particular ta la "meyor midida" pa demostrar si se ta a favor o non de la llucha contra'l calentamientu global.
 
Nesti alcuentru añal con ciudadanos y 'bloguers' de tol mundu orgnizáu dende la plataforma 'Blog Action Day', onde se debate d'un asuntu d'algame global, como ye'l casu, nesta edición, del Cambiu Climáticu, tamién participó la secretaria de Política Internacional y Cooperación, Elena Valencianu, y la secretaria d'Innovación de Nueves Tecnoloxíes, María González, dende la sede del PSOE en Ferraz.
 
En referencia a los presupuestos destinaos a I+D+i, González esplicó que cubren les necesidaes gubernamentales y alvirtió que "nun ye responsable xenerar una alarma que puea xenerar la fuga de talentos". Pela so parte, Elena Valenciano reconoció qu'en materia de cooperación que "siempre los recuros son mui llendaos y les necesidaes de los países en desarrollu enormes".