"Los personaxes que salen nos mios llibros afítense en neños de carne y güesu"

Falamos col escritor y maestru Xulio Berros, que ta acabante d’espublizar na colección escolín de l’Academia de la Llingua Asturiana la obra “Toya yá ye grande”.
 
“Toya yá ye grande” supón la recuperación d’un personaxe que tien una importancia bultable dientro de la to obra narrativa. ¿Qué tien Toya que la fai tan especial?
 
Toya ye un personaxe que me presta enforma, ye una neña que va medrando en cada llibru, y lo que la fai especial a la hora d’escribir ye que nella van quedando reflexaes munches pingarates de la mio fía, eso sí, bien mazcaritaes. Amás nos dos caberos llibros de Toya, Andrea Berros (la mio fía) emprestó a Toya dos poemes perguapos.
 
Amás de la propia Toya, nel testu podemos atopar más personaxes que recuerden perfectamente a lo que ye la vida familiar y escolar d’un neñu o neña . Como maestru y padre, ¿Qué más elementos de la to vida queden espeyaos nel testu? (si ye que puen cuntase)
 
Dalgún pue cuntase: ya despliqué la rellación ente Toya y la mio fía, amás dalgunos personaxes que van apaeciendo nel piñu de neños y neñes qu’arrodien a Toya son rapacinos a los que conocí dando clase, tamién la casa de Toya furrula de manera asemeyada a la de mio, y nesti caberu llibru apaez una mayestra que fai en clase coses bien paecíes a dalgunes de les que faigo yo tolos años nel colexu, y hasta equí podemos lleer…
 
¿Pue dicise entós que ser maestru facilita a la hora d'escribir lliteratura infantil y xuvenil o supón una torga?
 
Nel mio casu ye un fechu que fai muncho más fácil el llabor d’escribir. Los personaxes que salen nos mios llibros afítense en neños de carne y güesu a los que voi conociendo añu tres añu, imprescindibles pa lo que quiero reflexar, que nun ye otra cosa que pequeñes hestories de neños d’anguaño, hestories que xurden munches vegaes de lo que veo facer a los rapacinos cada día.
 
Nel llibru vemos amás dellos temes que resulten novedosos, pero rescampla sobre manera’l tratamientu del tema de la muerte ¿qué te lleva a querer afrontar esta cuestión?
 
Añu tres añu voi atopándome cola esperiencia de ver neños que pierden güelos y tamién compruebo como faen frente a estos fechos, y de siempre me llamó l’atención la manera que tienen los rapacinos d’afrontar la tema, y que traté de reflexar nel llibru, y que podemos resumir en: en silenciu y con muncha naturalidá.
 
D’otra manera tamién sorprende la importancia que toma nel testu la música, personificada nel cantante asturianu Nacho Vegas. Podría pensase que nun ye la música más afayadiza pa la reciella y por embargu encaxa nesta historia. ¿D’ónde surde la necesidá de que la so música y lletres tean presentes nel llibru?
 
Toya tien una madre que la va afalando a oyer música que nun sal nes radiofórmules y demientres tol llibru la neña escucha un discu de Nacho Vegas al que va garrando munchu ciñu, daqué qu'esperimento tolos años na escuela pues los mios escolinos escuchen tolos años dalgún discu de Vegas, y a toos y toes ensin esceición termina por présta-yos un cachu y garantizo que ye obligatorio que-yos preste; esti mesmu añu la reciella cola que trabayé conoció perbién el discu “Actos inexplicables” (el mesmu qu’escucha Toya) y gustó-yos un montón, n’especial los cancios ”Seronda” y “Al norte del norte” . Cuando neños y neñes de 10/11 años descubren otres músiques son mui receptivos, asina que nun podemos perder la ocasión de dá-yoslo a conocer y aprovechalo en colexu.
 
Toi mui d'alcuerdu con eso. Dicir amás qu'al marxen de la propia historia'l llibru va acompañáu con una serie de recursos didáuticos pal trabayu del testu nel aula d’informática. ¿Qué papel puen xugar les nueves tecnoloxíes na lliteratura infantil y xuvenil?
 
Dende va tiempu cada vegada qu’espublizo un llibru faigo dalguna xera multimedia que los llectores puean facer dempués de la llectura. Ye vezu de mayestros encargar trabayos dempués de lleer un llibru, actividaes que me paecen espantibles y que munches veces llogren que los neños aborrezan lleer, asina que como alternativa intento plantegar xuegos didáuticos pa facer col ordenador alrodiu del llibru; y la esperiencia demuéstrame que pa los neños son bien prestosos y pa los enseñantes cumplen los mesmos oxetivos que los trabayos tradicionales. Al mio paecer, xuntar llectures infantiles y xuveniles con trabayos pa facer col ordenador, llogra que medre l’interés de los neños por una obra.
No que cinca a la rellación ente TIC y LIX, la vuesa páxina ye un exemplu de bona xuntura de nueves tecnoloxíes y lliteratura pa xente mozo.
 
Otru exemplu ye'l portal educativu "Puertu Asturies" del que formes parte ¿Qué supón esta páxina y qué queda por facer nesti ámbitu?
 
“Puertu Asturies” ye un finxu na enseñanza asturiana, una esperiencia d’intercambiu de materiales pal profesoráu asturianu, y que medra añu tres añu gracies al enfotu de cinco profesores que gasten un montón del so tiempu llibre nel caltenimientu del portal, y les collaboraciones d’un garapiellu de mayestros entusiastes a los que-yos presta compartir colos collacios los sos trabayos. Anguaño hai bayura de trabayos, de videos, d’enllaces y de xeres de calter multimedia que vamos faciendo o tornando d’otres llingües. Por facer queda siguir afondando na recoyida de recursos, y tamién nel diseñu de nuevos materiales que seyan granibles com xeres de sofitu y afondamientu de les clases de Llingua Asturiana. Ente los caberos espublizaos tenéis un llibru multimedia coles xeres pa facer dempués de lleer “Toya yá ye grande”.
 
Pa finar agradecete enforma la to collaboración pa cola páxina d’A la gueta y pidite que nos dexes un mensaxe pa los llectores de “Toya yá ye grande”
 
A los llectores Toya da-yos les gracies por selo, y naguo porque se vieren reflexaos, anque namás fuera una migayina, en dalguna parte del llibru.
Y gracies a vosotros pol enfotu que ponéis en dar a conocer la nuesa lliteratura pa rapacinos.
 
 

Comparte...                                    

Enllaz permanente