El Farho Xixón Baloncestu perdió tres la prórroga

"El Farho Xixón Baloncestu perdió nel so campu escontra’l Huelva, pol resultáu de 68 a 74, nun partíu que pudo ganar nos tiros llibres y que la falta d’aciertu llevólu a xugar una prórroga na que los foriatos foron meyores. Los asturianos siguen nos puestos de “play-off”de descensu –son decimosestos- y tienen tres d’ellos al Burgos y al Tenerife coles mesmes victories. Los xugadores xixoneses llucharon, pero tuvieron mui mal n’ataque, asina los porcentaxes foron mui floxos –trés triples de ventitrés intentos, venti canastes de dos de cincuenta y ocho intentos y diecinueve tiros llibres metíos de trenta y ún posibles-. Tuvieron bien nel rebote, nel que foron superiores a los andaluces, pero de los cincuenta y cuatro garraos ventisiete foron ofensivos, lo qu’asoleya lo muncho fallaron nel ataque.

Amás los xugadores del perimetru tuvieron permal, siendo que Poves nun metió más que dos puntos –de dos tiros llibres-, Dani López trés puntos –d’un triple- y Rubén Suárez ún d’un tiru llibre. El meyor de los xugadores esteriores foi Peter Rajniak –once puntos- y Mark Bigelow mancóse nel segundu cuartu cuando llevaba seis puntos. Con esos porcentaxes ye mui difícil ganar y los locales cuasi lo llogren, pues faltando dos minutos pa finar el partíu perdíen d’ un puntu, 57 a 58, tres dos tiros llibres encestaos por Waleskowski y entróse nel últimu minutu con esi resultáu, cuando faltando trenta y trés segundos Dani López falló dos tiros llibres d’ una personal de Van Lacke.

El Huelva falló l’ataque y el mesmu Dani López llogró un triple, faltando siete segundos trés décimes, que ponía’l partíu del llau xixonés, pero Salva Camps con un gran triple ponía a los foriatos delantre, 60 a 61, anque-y tocaron falta a Antonio Reynolds sobre Rubén Suárez, faltaben dos segundos cuatro décimes, y el xugador canteranu tuvo’l partíu nes sos manes, pero namás qu’encestó’l segundu tiru llibre y ello llevó a la prórroga, na que los onubenses xugaron meyor, pues amás los locales nun foron a meter los tiros llibres de les personales de los andaluces -Isma Torres falló dos de cuatro intentos-, y los onubenses garraron una ventaya de seis puntos, 64 a 70, nel últimu minutu de la prórroga, anque Iturbe y Torres con cuatro puntos seguíos punxeron a los locales a cuatro puntos, 66 a 70, pero yá nun había tiempu, pues faltaben ventiséis segundos, y l’ Huelva supo xugalos y ganar l’ alcuentru.

L’alcuentru foi igualáu a lo largo tolos cuartos, asina nel primer cuartu les ventayes d’un y otru equipu foron curties, l’Huelva llegó a ganar de cinco puntos y los locales d’ún. Un datu a destacar ye que nesti periodu los ventidos puntos foriatos llográronlos dos xugadores: Stephens –dieciséis puntos- y Drame –seis puntos-. Waleskowski, que tuvo mancáu nel llombu pente la selmana, xugó l’ultimu minutu y mediu. Nel segundu cuartu la iguladá siguió y les ventayes nun diben más allá de los trés puntos. L’entrenador foriatu, Pepe Rodríguez, rotó a los sos xugadores pa protexelos de les personales –asina sentó a Stephens-. Nesta fastera’l cuartu foi cuando se mancó Bigelow. El másimu anotador local del periodu foi Isma Torres con cinco puntos y llegóse al descansu con empate a trenta y trés. Nel tercer periodu los asturianos punxéronse delantre y algamaron una ventaya de cinco puntos, 42 a 37. Entós Pepe Rodríguez cambió al base, quitó a Urreitzi y punxo a Camps, y ello atascó a los locales nel ataque, anque los andaluces nun se diben nel marcador y ganaben por un o dos puntos. El cuartu finó con un 45 a 46.

L’últimu periodu foi mui igualáu y los foriatos llegaron a tener una ventaya de cinco puntos, 53 a 58, pero un triple de Rajniak y los tiros llibres de Waleskowski punxeron esi 57 a 58 col que se llegó a esos dos últimos minutos.

Nel Farho Xixón Baloncestu los xugadores más destacaos foron Isma Torres (19 puntos, 9 rebotes, perdió 1 balón, punxéron-y 2 tapones y ficiéron-y 11 faltes personales) y Antxon Iturbe (7 puntos, 9 rebotes, 3 asistencies, recuperó 1 balón y perdió 2, amás ficiéron-y 3 faltes). Nel C. B. Huelva’l meyor foi Jarret Stephens (33 puntos, 7 rebotes, 1 asistencia, perdió 3 balones y recuperó 1, ficiéron-y 5 faltes y tuvo la meyor valoración del partíu con 31 puntos) y Federico Van Lacke (12 puntos, 3 rebotes, 5 asistencies, recuperó 1 balón y ficiéron-y 6 faltes).

Ficha téunica:
Farho Xixón Baloncestu: Dani López (3), Peter Rajniak (12), Mark Bigelow (6), Antxon Iturbe (7) ya Isma Torres (19). Tamién xugaron: Chus Poves (2), Keith Waleskowski (14), Iñaki Narros (4) y Rubén Suárez (1).

C. B. Huelva: Iker Urreizti, Federico Van Lacke (12), Fredrik Jonzen, Souleymane Drame (8) y Jarret Sthepens (33). Tamién xugaron: Salva Camps (5), Antonio Morón, César Bravo (2), Ross Schraeder (8) y Antonio Reynolds (6).

Árbitrios: Jorge Muñoz y Clemente López. Nel Farho Xixón Baloncestu nun hebo xugadores eliminaos por cinco faltes personales, nel C. B. Huelva foron eliminaos Fredik Jonzen (minutu 37) y Antonio Reynolds (minutu 44). Partíu de la vigésima xornada de la Lliga Adecco LEB, xugáu nel Palacio de los Deportes de La Guía con unos mil quinientos espectadores. Parciales per cuartos: 20-22, 13-11, 12-13, 15-15 y 7-13 (prórroga)."