Los Verdes y IX avancen puntos nel alcuerdu electoral

El partíu políticu “Los Verdes d’Asturies” sigue en negociaciones con Izquierda Xunida con vistes a zarrar un alcuerdu pa les elecciones autonómiques y a conceyos del próximu 27 de mayu. Joaquín Arce, representante d’esta formación política, esplicó a Asturies.com que l’alcuerdu” ta avanzáu pero entovía falta pa poder zarralu”. Arce centró l’actualidá de les negociaciones n’apautar “l’alcance de la posible coalición y el nome de la mesma” qu’adelantó que podría ser “Izquierda Xunida – Los Verdes – Bloque por Asturies” y nun quixo entrar a comentar posibles puestos dientro de les llistes nin en conceyos nin na llista autonómica. Según esplicó’l representante de Los Verdes, “más que negociar puestos lo que nos esmolez a Los Verdes nestes negociaciones ye’l garantizar que dende la coalición se lleven alantre determinaes polítiques que nosotros defendemos”. La llista de Los Verdes d’Asturies llogró nes pasaes elecciones autonómiques del añu 2003 un total de 6.561 votos.