Migoya diz que'l complementu de 5.000 euros a directores xenerales ye llegal y el PP apoyó eliminar la so prohibición

"La conseyera d'Alministraciones Públiques del Principáu d'Asturies, Ana Rosa Migoya, refugó güei les acusaciones del Partíu Popular sobre la supuesta illegalidá del complementu de 5.000 euros aprobáu pa los directores xenerales del Principáu, puesto que, según recordó, la prohibición d'esta paga quedó eliminada cola Llei de Creitu Presupuestariu del pasáu mes de xunu, a favor de la cual votó'l PP.

Migoya realizó estes afirmaciones en declaraciones a los medios enantes d'entamar el plenu de la Xunta Xeneral del Principáu d'esta mañana. Pretendió d'esta manera responder a les acusaciones de los diputaos populares José Ramón Cañal y Alejandra Cuétara, qu'ayeri, en rueda prensa, afirmaron que'l complementu de 5.000 euros ye illegal porque lo prohíbe la Llei de Presupuestos del 2007.

""Nun ye illegal el complementu"", afirmó la conseyera p'añadir que los diputaos populares ""mienten"". ""Ye verdá que la Llei de Presupuestos establecía nel artículu 13 qu'en nengún casu van ser d'aplicación a los miembros del Conseyu de Gobiernu'l complementu de productividá y gratificaciones por servicios estraordinarios"", esplicó. Pero dempués añadió qu'esta norma ""tuvo vixente hasta'l 13 de xunu del 2008, y na Llei de Creitu Estraordinariu d'esti mes s'eliminó la prohibición de la productividá y lo votó'l PP"".

Según Migoya, ""el PP sabía que teníemos evidentemente un problema: que determnaos niveles na Alministración cobraben pagues salariales penriba de los sos superiores y poro establecimos esi complementu de productividá"".

Esti complementu va aplicase a 55 directores xenerales, diez secretarios téunicos y tres directores d'organismos (Sepepa, IAP Riesgos Llaborales y Ente de Servicios Tributarios).

63 CARGOS EVENTUALES Y NON 105

La conseyera tamién acusó a los populares de ""mentir"", a la hora de dicir que'l Gobiernu elevare'l númberu de personal eventual y de gabinetes a 105, puesto que recordó que de los mesmos, 42 pertenecen a la Xunta Xeneral del Principáu, ye dicir, que trabayen pa los tres grupos políticos nella representaos.

""Mienten descaradamente pa facer creer que tenemos un númberu exaxeráu d'altos cargos, pero otres comunidaes, hasta más pequeñes qu'Asturies, tienen munchos más"", afirmó.

Nesti sen, recordó tamién que los altos cargos del Gobiernu del Principáu son 89, y non 103, como reprocharon los diputaos populares. ""Son un presidente, diez conseyeros, nueve viceconseyeros y asimilaos, diez secretarios xenerales teúnicos y 55 directores xenerales y asimilaos, amás del presidente del CES y tres directores de los organismos mencionaos anteriormente. Migoya afirmó que'l PP, ""malintencionadamente"" inclúi nesta llista a otros cargos como los de la Sindicatura de Cuentes o la Procuradora Xeneral, que nun correspuenden al Gobiernu.

""Tán mui avezaos a dicir mentires"", pero ""ésa ye la verdá y non les mentires del señor Cañal""."