Una trentena d'espertos d'universidades d'España y Europa participen nel I Conceyu Internacional de la Llingua Asturiana

"Una trentena d'espertos filólogos y historiadores d'Universidaes del Estáu y de dellos países d'Europa tomen parte, de magar mañana, nel I Conceyu Internacional de la Llingua Asturiana qu'entama l'Academia de la Llingua, dientro de les XXVII Xornaes Internacionales d'Estudiu d'esti idioma.

L'alcuentru, que contará con delles charres, conferencies y alderiques sobre aspeutos históricos y llingüísticos que marcaron los 1.000 años de vida del asturianu, va inaugurase mañana a les 12 hores nel Salón d'Actos de la Facultá de Filoloxía de la Universidá d'Uviéu. Nel actu intervendrán el rector de la Universidá d'Uviéu, Vicente Gotor Santamaría, la directora xeneral de Promoción Cultural y Política Llingüística, Consuelo Vega Díaz, el conceyal de Cultura y Deportes del Ayuntamientu d'Uviéu, José Suárez Arias-Cachero, y la presidenta de l'Academia de la Llingua Asturiana, Ana María Cano González. Dempués daráse pasu a la primer conferencia, a cargu del porfesor de la Universidá d'Uviéu, Javier Fernández Conde, baxo'l títulu 'Particularidá histórica nel País Ástur'.

Va ser la primera d'una riestra d'intervenciones sobre dellos temes, como manuscritos medievales asturiano-lleoneses, el derechu políticu y la so aplicación na Asturies medieval, el procesu de castellanización del sur de la cordillera cantábrica, o la documentación en llingua asturiana nel sieglu XIV.

El pasáu históricu llingüísticu de Lleón y la so rellación con Asturies marquen bona parte de les conferencies y charres. Asina les variantes diatópiques lleoneses, el romance medieval en Lleón o los manuscritos asturiano-lleoneses non lliterarios van ser temes d'estudiu propuestos por investigadores de les universidaes de Lleón y de Salamanca.

D'otres zones d'Europa van tar Max Pfister, de la Universidá de Saarlandes (Alemaña), que va falar sobre la importancia del asturianu pal 'Lessico Etimologico Italiano', y Paul O'Neill, de la Universidá d'Oxford, (Reinu Uníu), que va ofrecer una charra sobre'l pretéritu y tiempos averaos nel dominiu llingüísticu ástur.

Tamién van presentase dellos llibros que recueyen documentos históricos medievales n'asturianu y lleonés. Ente ellos destaca'l 'Fueru de Lleón y Conceyu de Coyanza', del sieglu XIII, recuperáu por Xosé Lluis García Arias y Javier Fernández Conde. También va presentase un volume de 'Documentos orixinales del dominiu llingüíscu ástur', del sieglu XIII, al cargu de J. Menéndez Gómez, de la Universidá de Caen.

María Josefa Sanz dará cuenta d'unos 'Testos asturianos a lo cabero del sieglu XIV' y Andrea Miranda va facer lo propio con 'Documentos orixinales del Monesteriu de San Vicente (sieglu XIII)'.

El programa va desarrollase de magar mañana, demientres los díes 4, 5 y 6 de payares, nel salón d'actos de la Facultá de Filoloxía, de magar les 16.00 hores, non siendo l'alderique de clausura, que va ser el xueves, día 6, a les 20.00 hores nel Club de Prensa de La Nueva España. El tema a tratar nesa ocasión serán les propuestes de collaboración sobre la llingua asturiana nes tierres de pasáu ástur, y van intervenir Emilio Gancedo (Lleón), Alfredo Hernández (Zamora), Antonio Bárbolo (Miranda do Douro), Xosé Antón González Riaño (Asturies)."