Cogersa va tomar darréu una decisión sobre si constrúi la incineradora

"El Consorciu pa la Xestión de los Residuos Sólidos n'Asturies (Cogersa) va tomar darréu la decisión definitiva sobre si constrúi una planta incineradora de residuos. Asina lo manifestó güei la directora d'Agües y Calidá Ambiental y vicepresidenta de Cogersa, Vanesa Pérez.

La vicepresidenta del Concorsiu realizó estes considerances, a engrugues de los periodistes, nuna rueda prensa ofrecida güei n'Uviéu pa presentar un festival de reciclaxe artísticu, na que tamién tuvo presente'l xerente de Cogersa, Santiago Fernández.

Vanesa Pérez, que dixo que la Xunta de Cogersa nun s'aconceyare n'ochobre y que nesti momentu nun hai nenguna convocatoria, esplicó que la construcción d'una incineradora ye un tema ""sobre'l qu'hai que tomar una decisión"".

Señaló que los responsables de Cogersa van tener en cuenta pa tomar la decisión definitiva tol ""alderique social"" que tuvo llugar n'Asturies sobre la planta, asina como l'estudiu multidisciplinar encargáu por Cogersa, que recomienda la construcción de la incineradora en Serín. El trabayu yá ta en tolos ayuntamientos asturianos. ""Van ser los componentes de la Xunta los que tomen la decisión oportuna"", señaló Vanesa Pérez.

La vicepresidenta de Cogersa nun quiso falar d'una fecha llende pa executar la infraestructura, anque recordó que la decisión ha ser rápida, dao que l'actual basureru tien capacidá hasta l 'añu 2015, según toles previsiones. ""Ye una decisión qu'hai que tomar yá, nun ye dalgo que se puea aplazar"", afirmó. Nesti sen, dixo que la construcción d'una planta incineradora va suponer un trámite d'unos cinco o seis años de ""plazu estimáu""."