La FICA diz que la Llei d'Asturianía tien de regular a los asturianos d'adopción

"El presidente de la Federación Internacional de Centros Asturianos (FICA), José Luis Casas, señaló güei que la nueva Llei del Principáu d'Asturies d'Asturianía nel Esterior, que se ta ellaborando na Xunta Xeneral, va tener de diferenciar ente los derechos individuales y los de les comunidaes y asina regular el conceutu de 'asturianos d'adopción'.

Casas esplicó, amás, que ye necesario que'l testu recueya como aspeutos fundamentales l'apoyu total a los centros asturianos y comunidaes repartíes pel mundu; y definir ""mui bien"" lo que son les federaciones que tienen de constituyise, asina como ofrecer más apoyu pa la integración de la mocedá nos centros asturianos.

Asina lo dixo en declaraciones a los medios de comunicación tres la receición de la presidenta de la Xunta Xeneral del Principáu, María Jesús Álvarez, y los miembros de la Mesa del Parlamentu asturianu a los representantes de los centros asturianos participantes na comisión de Presidencia, Xusticia y Igualdá pa esponer la so opinión sobre la propisición de Llei d'Asturianía.

Casas apuntó que cerca de 10.000 asturianos de primer xeneración y más de 500.00 descendientes en tol mundu puen ser beneficiarios de la llei. Sicasí, remarcó la necesidá de facer un censu pa disponer d'un rexistru oficial. De la mesma manera, apostó por que se caltenga la función de coordinación de la FICA.

Pal presidente de la federación, les condiciones d'asturianía pa les comunidaes nel esterior tienen de flexibilizase pero tres un estudiu porque hai munchos centros onde ""nun se cumplen tolos requisitos que se piden"".

Por eso, entiende que tien d'ayudase a les cases y comunidaes que nesti momentu nun tienen les condiciones pa que led tengan, y que ""tou asturianu que tea fuera d'Asturies, al traviés d'una comunidá o de manera individual, tenga reconocida la so asturianía"". Amás, añadió que'l nome de la Llei tenía de basase nel conceutu 'fuera d'Asturies' en vez de 'nel esterior'."