El sistema de nomamientu del Presidente asturianu

"La fórmula sobre la elección del presidente rexonal y el so posible cambiu pa que s'asemeye a la que desarrolla la Constitución española nel procesu d'elección del presidente, siguen ensin cuntar col consensu de los trés grupos, que decidieron posponer y dexar abierta esta cuestión.

Asina, IX-BA-Verdes y PP apoyen la fórmula de designación, demientres que los socialistes defenden el modelu actual.
A la salida del conceyu de la ponencia'l voceru del grupu parlamentariu del PSOE, Fernando Lastra, indicó en declaraciones a los medios que la pretensión de los socialistes ye ""garantizar la elección del Presidente al partíu que tien la posibilidá nesti momentu de facer una propuesta de Presidente"".

Lastra esplicó qu'efeutivamente lo que se pretende ye que'l candidatu a la Presidencia seya'l que decide'l partíu que lu presenta, non que les minoríes puean determinar non sólo si s'escueye o nun s'escueye presidente. ""Diba ser una atribución, al mio xuiciu, desaxerada qu'un partíu minoritariu o dellos tuvieren decidiendo qu'esi candidatu nun val, que propongamos otru, qu'esti tampoco val, que propongamos otru"", dixo Lastra, qu'indicó que tán énte ""una reflexón abierta"".

A la fin, los socialistes muéstrense partidarios de caltener el procedimientu afitáu na llei del presidente, yá que consideren que sigue siendo ""un bon métodu facer l'unvíu dende l'Estatutu a la llei"". ""Esta sería una manera de resolver la diferencia qu'hai ente los que prefieren un procedimientu de nomamientu y los que preferimos un procedimientu d'elección"", dixo Lastra.

Pela so parte, el voceru del PP, Ovidio Sánchez, insistió en que los grupos siguen trabayando sobre la decisión respecto a la fórmula d'elección del presidente y recordó que'l so partíu inclínase más pola de nomamientu, dalgo qu'aseguró y defendió nel so conceyu d'ayeri. Nesti sen, Ovidio Sánchez recordó qu'esta ye la fórmula de la mayoría de les comunidaes autónomes y añadió que ""nun ye nada nuevo"". Sicasí, indicó que cada grupu da la so opinión y dempués concrétense les postures nel documentu que salga de la ponencia. Sánchez recordó que ya en 1.996 siendo'l mesmu presidente de la Cámara, encargó un informe sobre la fórmula del nomamientu, polo que ""nun hai cambiu de postura"" per parte del so partíu.

A xuiciu d'IX-BA-Verdes resulta ""mui interesente"" que'l PP tea dando-y vueltes a la so postura. Asina, Jesús Iglesias felicitóse de que seya posible ""volver a reflexonar sobre esti asuntu y sobre les suxerencies que'l dictame del Conseyu Consultivu formulaba"". Amás, indicó que la gran mayoría de los estatutuos ya reformaos ya recueyen el métodu de designación como fórmula que permite que los diputaos exerzan toles opciones a la hora de la elección, dende'l votu positivu al negativu."