El semiólogu Tzvetan Todorov, Premiu Príncipe d'Asturies de Ciencies Sociales

"El xuráu del premiu Príncipe d'Asturies de Ciencies Sociales considera que'l semiólogu y filósofu Tzvetan Todorov representa el ""espíritu de la unidá d'Europa, del Este y del Oeste"". Asina mesmo, sorráyense los ideales de ""llibertá, igualdá, integración y xusticia"" que representa Todorov.

L'acta del xuráu, lleíu esti mediudía n'Uviéu, conseña que'l semiólogu búlgaru ye representante de ""un rigurosu métodu estructuralista qu'aplicó a la lliteratura y a la crítica lliteraria"".

Nacíu en Bulgaria, Tzvetan Todorov ye direutor de la Escuela d'Altos Estudios Sociales nel Centru Nacional d'Investigaciones Científiques de París, siendo profesor invitáu nes universidaes de Yale, Harvard, Columbia y Berkeley, ente otres, y tornándose les sos obres a venticinco llingües. En Francia desarrolla tola so obra, valiendo ésta de pegoyu pa los estudios llingüísticos, sobre manera nel campu de la semiótica.

El xuráu d'esti Premiu - convocáu pola Fundación Príncipe d'Asturies na so XXVIII edición - tuvo presidíu por Manuel Fraga Iribarne ya integráu por Lluis Xabel Álvarez, Gonzalo Anes, Raúl Bocanegra, María Emilia Casas Baamonde, Adela Cortina, Mercedes Fernández-Martorell, Ángel Gabilondo, José Luis García Delgado, Josefina Gómez Mendoza, Manuel Jesús González, Luis González Seara, María del Carmen Iglesias, Aurelio Menéndez, Adolfo Menéndez, José Manuel Otero Novas, Rosa María Rodríguez Magda, Rafael Puyol y Juan Vázquez. Al premiu optaben 36 candidatures de les que la del economista Jeffrey Sachs foi finalista."