Valledor critica'l calter "residual" de la llingua asturiana na TPA

"El diputáu d'IX-BA-LV, Francisco Javier García Valledor, dixo esti xueves que la coalición a la que representa nun-y dará'l votu a la renovación de José Ramón Pérez Ornia como direutor xeneral del mediu de comunicación públicu d'Asturies, RTPA, por nun ""cumplir colos sos oxetivos cimeros"".

Pa Valledor, ente éstos atópase la ""non potenciación"" de la identidá, la cultura y la llingua propia d'Asturies. Asina'l diputáu aseguró, en rueda prensa, que la llingua asturiana ye un elementu ""residual"" dientro de la parrilla televisiva de la TPA.
""Paradóxicamente"" siguió García Valledor ""éstos son los programes con más aceutación y más vistos de la programación de la TPA"", lo qu'amuesa la demanda de los asturianos hacia una programación ""empobinada"" a esparder la cultura y la llingua propia.

Amás, el diputáu de la coalición afirmó que la TPA ye un ""negociu"" pa les productores de fuera d'Asturies que subcontraten la realización de ciertos conteníos a les productores asturianes. Nesti sen, Valledor punxo como exemplu les ""baxes condiciones"" llaborales de los trabayadores d'estes productores.

Otru de los argumentos de Valledor pa nun sofitar el nomamientu de Pérez Ornia básase en que la televisión duplica'l compromisu de gastu y d'inversión comprometíu de 15 millones d'euros añales. ""Y esti yá son 30 millones, ensin cuntar el patrociniu del Principáu a la financiación de dalgunos de los programes, que podría perpasar los 35 millones"" aseguró.
Amás de criticar la xestión de Pérez Ornia na RTPA, Valledor espresó la so sorpresa pol votu favoratible del PP, dempués de los esmolecimientos qu'espresaren nel so día los populares, que llegaron a acusar a Ornia de ""manipulador al serviciu del PSOE"", creando ""una televisión a la búlgara""."