Namás hai cuatro nomes nuevos nel llistáu de conseyeros que se fexo públicu ayeri tres de la proclamación como presidente de Vicente Álvarez Areces. Seis conseyeros del anterior gobiernu repiten y hai delles conseyeríes que cambien les sos competencies. María José Ramos sigue como conseyera de Presidencia y va llevar tamién les polítiques d'Igualdá y les de l'antigua Conseyería de Xusticia y Seguridá Pública, mientres qu'Ana Rosa Migoya dexa Cultura pa dirixir Alministraciones Públiques, pero calteniendo la portavocía del Gobiernu. Repite tamién Graciano Torre, que va siguir como titular d'Industria y Empléu y Francisco González Buendía va ser el Conseyeru d'Infraestructures y Política Territorial, que garra les competencies de vivienda. José Luis Iglesias Riopedre va cumplir otra llexislatura más al frente d'Educación, mientres que n'Economía, que recibe agora tamién les comptencies d'Asuntos Europeos alcuéntrase Jaime Rabanal.

Les entraes nueves son les del médicuRamón Quirós (Xixón 1959), al frente de Sanidá y Pilar Rodríguez Rodríguez, llicenciada en socioloxía y esperta en xerontoloxía, como conseyera de Bienestar Social. Encarnación Rodríguez Cañas (Lleón 1958) que vien de dirixir la Orquesta Sinfónica d'Asturies, va ser la nueva conseyera de Cultura y Turismu, mientres que Belén Fernández (Carreño 1963) que fuere Viceconseyera de Mediu Ambiente y Ordenación del Territoriu va estrenar la conseyería de Mediu Ambiente, que dexa les competencies d'ordenación pero garra de Desarrollu Rural.

Les reacciones dende los bancos de la oposición al nuevu executivu asturianu forton negatives. Dende'l PP Ovidio Sánchez definió l'executivu como "un executivu de mínimos, gris y ensin capacidá p'afrontar el futuru d'Asturies" mientres que dende IX-BA-LV, Jesús Iglesas afirmó que l'executivu nuevu tien "un perfil políticu mui baxu" y que lu componen "persones venceyaes a Areces". El fechu de que repitieren seis conseyeros da-y que pensar a Iglesias que'l Gobiernu presentáu ayeri "tien vocación de ser daqué provisional".