Mieres, L.lena, Avilés y Cangas reparten ente'l comerciu bolses de papel con una conseña n'asturianu a favor de reciclar

|

Los Conceyos de Mieres, L.lena, Avilés y Cangas del Narcea, van repartir ente los comercios d'estos conceyos bolses de papel recicláu nes que se llee la conseña: "¿Tú qué faes pa cuidar el mundu? Reduz, reutiliza, recicla". Trátase d'una iniciativa que busca la concienciación col cuidáu ambiental, al traviés de la sustitución de les bolses de plásticu poles que se tán distribuyendo.

   Les conceyales mierenses de Cultura, Diana González, y Comerciu, Montserrat González, presentaron esta mañana la iniciativa nesti conceyu, enmarcada na campaña de promoción del usu del asturianu 2008-2009. Trátase d'un proyeutu col que se pretende, "al traviés de la llingua asturiana, tresmitir un mensaxe de concienciación sobre'l cuidáu del mediu ambiente, potenciando l'emplegu de bolses de papel recicláu", esplicó'l Conceyu nuna nota prensa.

   Trátase d'un proyeutu de la Conceyalía de Cultura, al traviés del Serviciu de Normalización Llingüística de Mieres, y de la Conceyalía de Comerciu, y va desarrollase en collaboración colos servicios de normalizacion de L.lena, Avilés y Cangas del Narcea.

   La campaña se realiza al traviés del repartu de baldre, nos comercios del conceyu, de bolses de papel recicláu impreses con tinta ecolóxica.

   El conceyu de Mieres aportó al proyeutu 1.500 euros pal diseñu y la realización de les boses. Nestos díes va procedese al so repartu ente los comercios de ropa, calzáu, regalos, llibreríes y otros comercios minoristes, asina como ente los comerciantes del mercáu de los domingos.

   La conceyala de Cultura allabó esta iniciativa que se desarolla col apoyu del Principáu, cola que se pretende "concienciar al comerciu de la necesidá de dexar d'emplegar les boses de plásticu y pasar al papel, y esta cmapaña mos permite unificar dos oxetivos, per un llau la promoción del usu del asturinau nel comerciu llocal y, per otru, la sensibilización ecolóxica de comerciantes y compradores".

   Pela so parte, la conceyala de Comerciu y Turismu recordó qu'esta iniciativa pa comerciantes ta abierta tamién a les grandes superficies, que se puen sumar a la campaña.

Contador Estadistiques