La Xunta pola Defensa de la Llingua llama a manifestase esti vienres

|

La Xunta pola Defensa de la Lingua Asturiana llama a movilizase en defensa de la oficialidá'l esti vienres 8 de mayu, na tradicional manifestación del Día de les Lletres Asturianes. Baxo'l lema "Agora tenemos la pallabra", la XDLLA convoca a la ciudadanía a movilizase conseñando que "a les puertes d’una nueva reforma del Estatutu d’Autonomía d’Asturies ye necesario dar otru pasu y llograr el reconocimientu del asturianu como llingua oficial".
 
La manifestación va salir de la Estación del Norte d'Uviéu a les 19:00 hores.

Según la Xunta pola Defensa de la Llingua Asturiana, "el movimientu de reivindicación llingüística consiguió va trenta años acutar un día del calendariu nel que la llingua asturiana sería la protagonista. Un día nel que destacamos el valor insustituíble del nuesu patrimoniu llingüísticu y la so importancia central na construcción del futuru d’Asturies. Un día nel que reivindicamos los mesmos derechos llingüísticos que disfruten cuantayá’l restu ciudadanos del Estáu".

Pa la organización de defensa del asturianu "en tou esti tiempu, venimos sufriendo una clase política acomodada nes instituciones, despreocupada, irresponsable y belixerante que vien faciendo tolo posible por anular cualquier mínimu avance na dignificación y normalización de la llingua asturiana. Sicasí, la sociedá civil vien dando muestres clares de qu’hai una mayoría amplia y plural que siente apreciu por esti idioma. Hai n’Asturies un movimientu de reivindicación llingüística que, col compromisu y la palabra, yá ye quien a consiguir avances a pesar de la oposición frontal de los que tienen el poder".

"Nes últimes selmanes tuvimos buena prueba d’ello. La movilización ciudadana foi quien a dar vuelta a los intentos d’esclusión del asturianu na Escuela de Maxisteriu. Una mayoría amplísima de docentes y representantes d’alumnos non solo evitó la desapaición de les titulaciones de llingua asturiana sinón que foi quien a incorporales la vez primera dientro los nuevos planes d’estudiu", afita la XDLLA, qu'añade qu'esi "ye’l camín y per esi camín vamos siguir".

Comentarios

Porqué si'l lema del cartelu trai "agora tenemos la pallabra" Pablo R. Alonso pon "palabra"?
Home ho! qu'esto nun ye lne.es

Gracies pol avisu.
 
Un saludu
 
Pablo R. Alonso

Contador Estadistiques