El Principáu destina 800.500 euros pa una convocatoria de sovenciones pa la normalización del asturianu

El Conseyu de Gobiernu del Principáu d'Asturies autorizó, nel so conceyu d'ayeri, una partida de 800.500 euros pa financiar la convocatoria pública pa la concesión de sovenciones pa la normalización social del asturianu, y nel so ámbitu gallegu-asturianu, según informó nuna rueda de prensa n'Uviéu la conseyera d'Alministraciones Públiques y Vocera del Gobiernu, Ana Rosa Migoya.

   Tamién s'aprobaron güei 357.000 euros, pa financiar les sovenciones pa programes d'actividaes culturales d'asociaciones, fundaciones culturales privaes y actividaes culturales d'interés rexonal promovíes por particulares, fundaciones y asociaciones.

   A propuesta de Cultura y Turismu, s'aprobó la firma de sendos convenios colos ayuntamientos de Cangues d'Onís, Candamu y Peñamellera Baxa pa la conservación, abertura al públicu y espardimientu del dolmen de Santa Cruz, la cueva de La Peña de Candamu y la Cueva de La Loxa. Por mediu d'estos acuerdos, cáun de los trés conceyos citaos van recibir una sovención de 4.312 euros del Gobiernu rexonal.

   El Conseyu del Gobiernu del Principáu d'Asturies aprobó tamién la firma d'un conveniu pa la construcción del campu de fútbol d'herba artificial en Barcia, nel conceyu de Valdés. L'importe del conveniu asciende a 550.000 euros, de los que'l Gobiernu rexonal va aportar 420.000 euros. D'ellos, 300.000 van financiase esti añu y los 120.000 restantes nel añu 2010.

   Amás, el Gobiernu aprobó la firma de cinco convenios y la concesión de sovenciones, por un importe global de 371.500 euros, a les mancomunidaes d'Avilés, Cabu Peñes, Valle del Nalón, Ozcos-Eo y la Montaña Central pa la execución de distintos planes de calidá turística nel 2009.

   A lo último, en materia d'igualdá, el Gobiernu asturianu autorizó una partida de 132.144 euros pa la convocatoria pública de sovenciones de carácter pluriañal (2009-2010) destinada a la execución de proyeutos d'investigación con perspectiva de xéneru.