Olivines

La dama de la poesía asturiana

Cola mesma senciellez con que vivió dexónos, el pasáu sábadu día 11, la escritora valdesana Mª del Carmen Losada Rico, más conocida como Nené Losada. La coincidencia de la so muerte cola d’otra conocida escritora asturiana, qu’enllenó abondes páxines nos medios de comunicación, pue facer que pasé desapercibida esta lluctuosa noticia que dexa güérfanes a les lletres asturianes d’anguaño.

    Con sólo tres llibros de poemes (Cantares Valdesanos; Entre apigarzos; El nome de las cousas) y una antoloxía (Fueyas que reverdecen), Nené convirtióse nuna de les grandes escritores de la lliteratura en llingua asturiana. A esto hai que-y sumar la so obra en castellán, recoyida nun llibru editáu pola Fundación Fernández Lema baxo’l títulu: Obra poética en castellano y acompañada d’un CD con un garapiellu de poemes, en dambes llingües, que nos permite, a nós y a los nuesos descendientes, el deleite de poder sentilos na so propia voz.

    Conocí a Nené siendo los dos xuraos del concursu de poesía Fernán Coronas, hai yá unos cuantos años. Y dende entós, la so calidá humana y lliteraria, ficieron que caltuviera con ella una amistá personal de la que siempre taré arguyosu. Xunto con Antón García, tuve’l privilexu de presenta-y, nel Atenéu Obreru de Xixón, la so antoloxía poética Fueyas que reverdecen, y d’asistir a los grandes momentos de reconocimientu social que tuvo, como la Medalla de Plata d’Asturies, o’l nomamientu de Fía Predilecta de Valdés. Nun soi a resistime a cuntar una pequeña anéudota personal, precisamente d’esi día en que la nomaron Fía Predileuta de Valdés, xusto va a facer un añu:

     Tando na fiesta que siguió al nomamientu, llamónos al so llau a la mio muyer a mí y díxome: “La última vez que tuvimos xuntos pedístime que te recitara “Cartinas d’amor” (un maraviosu poema que sabía que me prestaba muncho). Como nun pude facelo entós, voi recitátelu agora”. Y ellí, delantre de la xente que l’arrodiaba, recitóme al escuchu’l poema dexándonos respigaos. Ye un recuerdu que guardaré pa siempre.

    Podíen dicise munches coses más de Nené, y dalgún día habrá que les dicir. Pero agora namás quiero dexar afitao lo muncho que la quería, y lo güérfanes que van quedar n’adelantre les lletres asturianes ensin esta gran dama de la poesía.

    Un abrazu mui fuerte pal so fíu Juan Antonio, tamién queríu amigu, y a Nené desea-y que la tierra-y seya leve.

Comparte...                                    

Enllaz permanente