Fernández Díez, primer líder de la Copa d’Asturies tres ganar en Mual

El sub-23 Víctor Fernández Díez proclamóse ganador de la  III Carrera per Montaña Puerta de Munieḷḷos, prueba qu’abrió’l domingu la Copa d’Asturies de Carreres per Montaña 2014. En categoría femenina la vencedora foi Marta Escudero.

Mual acoyó esta competición espectacular consistente nun percorríu de 27 quilómetros, con un desnivel acumuláu de 3.900 metros, de los que 18 quilómetros foron per sienda, 6,5 per pista y 2,5 per pista formigonada, que dominó’l Grupo de Montaña Peña Santa al llevar el trunfu nes categoríes masculina y femenina gracies al esfuerciu de Fernandez Díez y Escudero. La carrera destacó pola so emoción, yá qu’ente los trés primeros hubo namái 26 segundos de diferencia. Rubén Álvarez Álvarez (Toscaf Recta Final) finó en segunda posición (14 segundos), mentes que’l veteranu Pedro Rodríguez Cuenca (CD Picu Cubil) tuvo que conformase cola tercer plaza. El tiempu rexistráu pol corredor del Peña Santa foi de 2 hores, 16 minutos y 14 segundos. Mentes, l’actual campeón de la Copa d’Asturies, Samuel Obaya (Club Avientu), terminó la carrera n’octava posición (2:25:41).

En categoría femenina, la campeona de la Copa d’Asturies 2013, Escudero (2:45:04), tuvo un trunfu mui tranquilu, al sacar 3 minutos y 39 segundos a la veterana Susana Álvarez Crespo (CD Piloña Deporte) y 6 minutos y 20 segundos a la tercera, Ana Cristina Aguado (GM Reino Astur), que compitió en categoría de veteranos B. Nel global d’equipos, el Club Avientu domina la clasificación de la Copa d’Asturies tres la so actuación en Mual al sumar 260 puntos, per los 192 del Picu Dubil, los 178 del Toscaf y los 148 del Peña Santa.

La prueba próxima puntuable de la Copa d’Asturies qu'entama  Federación de Deportes de Montaña, Escalada y Sienderismu del Principáu d’Asturies (FEMPA) va ser la VII Carrera El Asturcón. Ésta va celebrase’l 6 d’abril y consta d’un percorríu de 28 quilómetros pel Naranco con un desnivel acumuláu de 2.400 metros.