Samartín entama una Uiquimaratón nel Día de la Llingua Materna

Un taller d’edición va preceder esti xueves a la Uiquimaratón qu’entama'l vienres la Oficina de Normalización Llingüística de Samartín del Rei Aurelio y voluntarios d’Uiquipedia. Ésta va centrase n’artículos sobre’l conceyu.

La Casona del Bravial, de Blimea, va acoyer les actividaes d’esta iniciativa que coincide col Día Internacional de la Llingua Materna, celebración que tien llugar mañana, 21 de febreru. Pa les 18.30 hores de güei va facese una presentación del proyeutu Wikimedia y un taller d’edición d’Uiquipedia col oxetivu de que los usuarios puedan, dende los sos dispositivos, sumar artículos a la versión asturiana d’esta enciclopedia llibre creada pola Fundación Wikimedia y caltenida polos propios internautes.

Anguaño, tres diez años de vida, Uiquipedia cuenta con 19.400 entraes, una cantidá que va ampliase mañana mientres la ‘Uiquimaratón’. Ésta va desendolcase ente les 18 y les 21 hores, tiempu nel que los participantes van poder colgar artículos y semeyes rellacionaos con aquellos temes que más-yos interesen y que tengan que ver cola historia y el patrimoniu cultural de Samartín del Rei Aurelio, amás d’ampliar y ameyorar los yá esistentes.