La militancia d’Andecha Astur decide participar nes Europees na coalición liderada por EH Bildu

|

Andecha Astur aprobó nel Conceyu Xeneral estraordinariu celebráu’l sábadu la participación nes Europees dientro de la coalición que lidera EH Bildu. La formación caltién la propuesta d’entamar una candidatura asturiana xunitaria nella.

Pa ello, va treslladar una propuesta a lo llargo de la selmana “al restu de les formaciones sociales y polítiques que se mueven dientru’l marcu del soberanismu asturianu”. Una de les organizaciones coles que va contautar ye Conceyu Abiertu, que tien pendiente esti mes un alcuentru cola coalición de partíos vasca nel que, ente otros munchos asuntos, va tratase la cuestión de les aliances de cara a les eleiciones al Parllamentu Européu del 25 de mayu. El pasáu 6 de febreru, una delegación de la plataforma d’eleutores formada por Bruno Gómez y Iván Martínez treslladóse a Barcelona p’aconceyar con representantes de la Candidatura d'Unitat Popular (CUP), en concreto col responsable de Rellaciones Polítiques, Quim Soler, y con Joan Teran, miembru del Secretariat Nacional. Na mesma intercambióse información sobre l'actualidá política y social de los dos países, y falóse tamién de les Europees. Según confirmó Mariu Arbesú, coordinador nacional de Conceyu Abiertu, la militancia va decidir la posición definitiva a tomar nun Conceyu Nacional a celebrar en marzu.

A primeros de marzu ye tamién cuando les bases de les CUP van consensuar si participen o non nes Europees. Nel casu de que los catalanes aprobaran acudir a esta cita coles urnes ye mui posible que lo faigan na coalición que promueve EH Bildu, a la que tamién se quier sumar el BNG tres la decisión d’ERC, el so compañeru principal n’Europa de los Pueblos-Verdes –coalición qu’algamó un eurodiputáu nel 2009– d’apostar por una vía catalana. El candidatu d’EH Bildu pa estes eleiciones ye’l periodista Josu Jairisti (Azkoitia, 1964), direutor del diariu Gara ente 2004 y 2011 y especializáu n’información sobre la Xunión Europea.

Un Conceyu Xeneral “productivu y pa medrar”

El secretariu xeneral d’Andecha, Arturu Xosé Bermeyu, calificó de “productivu y pa medrar” el Conceyu Xeneral que tuvo llugar el sábadu nel llocal de la formación n’Uviéu. Nél apróbose la llinia política a siguir pola organización nos años próximos, na que s’apuesta pola xunidá, “pero ensin permitir qu’ello suponga un paralís de la organización”. D’igual forma, sofitóse’l proyeutu municipalista que representa Conceyu Abiertu y viose necesario “aniciar una Mesa Nacional na que tean cabida toles formaciones socio-polítiques d’ámbitu nacional qu’asuman el derechu del pueblu asturianu a decidir”.

A lo llargo del Conceyu Xeneral estrarodinariu tamién se valoró la situación socio-política d’anguaño y se trataron aspeutos concretos de la realidá asturiana, “apostando por afondar tanto nos conteníos sociales como nacionales, denunciando cómo la izquierda española quier aprofitar la gravedá de la situación social que carecemos pa tapecer la custión nacional asturiana”.

Na semeya, Juaristi, candidatu d'EH Bildu a les Europees, mientres la so participación nel Ard Fheis, congresu añal del Sinn Féin que tuvo llugar la segunda fin de selmana de febreru.

 

Conteníu especial: 
Contador Estadistiques