Patrimoniu anicia colos trámites pa declarar la tonada asturiana Bien d’Interés Cultural inmaterial

La canción asturiana contará con un reconocimientu públicu y un grau mayor de proteición. El Plenu del Conseyu de Patrimoniu Cultural d’Asturies alcordó aniciar los trámites pa declarar la tonada como Bien d’Interés Cultural (BIC).

Esti órganu, asesor máximu en materia patrimonial de la Conseyería d’Educación, Cultura y Deporte, presidíu pola propia conseyera, Ana González, analizó 18 propuestes de proteición patrimonial, ente elles el de la tonada asturiana. “Trátase de la manifestación actual más destacada de la cultura musical asturiana, que tien los sos raigaños nel pasáu, pero que sigue muy viva nel presente”, espliquen dende’l Conseyu de Patrimoniu Cultural d’Asturies, que destaca a figures como "el Maragato, la Busdonga, los Cuatro Ases d'Uviéu (Cuchichi, Claverol, Miranda y Botón), Quin el Pescador, Xuaco de Sama, Juanín de Mieres, El Presi, Silvino Argüelles, José Noriega, Orestes Martínez, Diamantina Rodríguez o Mariluz Cristóbal Caunedo", ensin escaecer la importancia de les voces nueves de la canción asturiana.

La reunión tamién sirvió p’aprobar l’aniciu de los trámites pa declarar como BIC el tramu del Camín de Santiago que pasa per Noreña, les cases de los zapateros de Noreña, 120 escueles asturianes construyíes ente 1763 y 1957-59, y el conxuntu patrimonial de La Ponte (Llanera). D’igual forma, dio’l vistu bonu final a los espedientes que dan el calter de BIC a los elementos siguientes: Pozu Sotón (Samartín del Rei Aurelio), el pueblu de San Esteban de los Buitres (Eilao) y los castros de Pendia (Bual), de San Ḷḷuis (Ayande), Chao Samartín (Grandas de Salime) y Mohías (Cuaña), amás de la redolada d’ésti últimu.

Otra manera, el Plenu analizó la solicitú pa quitar el nivel de proteición BIC a la plaza de toros d’Uviéu, como desea l’ayuntamientu uviedín pa poder executar una reforma del edificiu y recuperar el so usu. Asina, va aniciar los trámites pa realizar un estudiu que valore les carauterístiques patrimoniales y históriques de la plaza de toros que determine’l grau de proteición nel que se debe situar. Tamién s’aprobó la solicitú del Centro Asturiano de Oviedo pa cubrir les sos piscinas nel Naranco y el Plenu recibió información de la reunión colos téunicos especialistes qu’analizaron les posibles meyores en San Miguel de Lillo, asina como sobre los trabayos fechos na ilesia de Santo Adriano de Tuñón.