La novena Delegación Asturiana de Verificación de Derechos Humanos en Colombia principió’l so trabayu

Aguachica ye’l primer destín de la novena Delegación Asturiana de Verificación de Derechos Humanos en Colombia, que yá ta trabayando nel terrén. La so presencia foi solicitada por cinco organizaciones sociales colombianes.

Según informa la Coodinadora d’ONGD del Principáu d’Asturies, la delegación asturiana ta conformada nesta ocasión “por un representante de Soldepaz Pachakuti, el coordinador del Programa Asturiano de Atención a Victimas de la Violencia en Colombia, un delegáu de la seición sindical de CC OO de caxAstur y representantes de delles organizaciones sociales” del Estáu. El so llabor va ser visitar zones de conflictu armáu y de conflictu social nel norte, centro-oriente y suroccidente del país, onde tán comunicándose “violaciones de derechos humanos sistemátiques y masives”. Una vegada nel llugar, van entrevistase coles víctimes y les organizaciones que solicitaron la so presencia y que conformen el comité de seleición del Programa Asturiano de Atención a Víctimas de la Violencia en Colombia. La delegación tamién espera aconceyar col altu gobierno, incluyíos tamién mandos de la fuercia pública, de les cárceles, de les instituciones de control y de los medios de comunicación.

La primer parada de los asturianos ye Aguachica, nel departamentu de Cesar, llugar que tamién visitaron nel 2010, cuando la delegación “recibió los testimonios impresionantes de los familiares de mozos executaos pol exércitu pa recibir recompenses”. El destín final ye San Pedro Frío-Mina Vieja, zona de minería d’oru y carbón. Javier Orozco, integrante del grupu asturianu, caltuvo reuniones col embaxador español y el ministru conseyeru, que collaboraron nel desendolcu de l’axenda, y cola vicepresidencia de la República, qu’informó a les xunidaes militares de les zones per ónde va pasar la delegación. 

L’Axencia Asturiana de Cooperación al Desarrollu, en Xordania

L’agora castellanizada Axencia Asturiana de Cooperación al Desarrollu ta agora de visita en Xordanía, en concreto nos campos de refuxaos de Zaatarí. La so direutora, Graciela Blanco, desplazóse hasta esti país pa conocer, de la mano de l’Asociación Mensajeros de la Paz y del so presidente, el Padre Ángel estos campamentos, onde viven 120.000 persones. Ensin accesu a agua corriente, esti llugar acueye a ciudadanos sirios que colen de la guerra que se vive nesti estáu d’Oriente Próximu.

La institución asturiana tien concedío una subvención de 74.125 euros a Mensajeros de la Paz pa l’adquisición de venti cases prefabricadas, una ambulancia y una unidá móvil, dientro del so programa ‘Ayuda de emergencia a la población siria refugiada en Jordania’.