Sucédense les reacciones a l’aprobación de la Mención d’asturianu en Maxisteriu

|

La Xunta pola Defensa de la Llingua Asturiana señaló que l'asturianu “entró por fin nos planes d'estudiu de la Escuela Universitaria de Maxisteriu” y rescampla que ye “la segunda vez que les intenciones escluyentes de la dirección del centru fueron refugaes por una mayoría clara”. Tamién'l Bloque por Asturies y Unidá Nacionalista Asturiana espresaron’l so contentu pol resultáu algamáu.

Dende la XDLLA destaquen que “tol procesu lleváu alantre nesti centru universitariu ye un exemplu que ye la cuenta pa desplicar munches coses. Per un llau ye prestoso ver que'l camín faise mui abegosu pa los pocos que siguen intentando dexar al asturianu fuera de los ámbitos d'estudiu formal, escaeciendo si fai falta los mandaos llegales esistentes. Per otru, ye de valorar que'l movimientu de reivindicación llingüística ye un sistema coordináu pa facese valir cuando se ta cometiendo un claru atentáu contra los derechos llingüísticos”.

Por too ello “hai que felicitase del trabayu fechu dende munchos puntos distintos (alumnos, profesores, sindicatos...), cola seguranza de saber qu'estos meses intensos de negociaciones, conceyos, actos reivindicativos y el bon facer de la xente que se dedicó a trabayar calladamente, asegurando esti resultáu urxente y necesariu, nun fueron de baldre. Les lleis tán pa cumpliles y acabamos de dexar claro que xuntos somos quién a impedir que se conculquen”.

Sicasí, dende la organización quixeron recordar “que’esti pasu, anque importante, namás ye un tramu pequeñu del camín qu’entá queda por andar. L'asturianu sufre munchos impedimentos nel sistema educativu asturianu, con escolinos que nun tienen garantizaos los sos derechos, especialmente na enseñanza secundaria, y con una presencia mui probe nel tramu de los estudios universitarios”. A too esto hai “que sumar la situación de precariedá na que vive'l profesoráu por culpa de nun tar reconocida como especialidá l'asignatura, lo que fai que s'imparta nuna situación d'anormalidá, ensin oposiciones nin garanties de continuidá”.

El Bloque por Asturies y UNA súmense a les felicitaciones

Pela so parte’l portavoz del Bloque por Asturies, Pablo Fernández, felicitó a la comunidá universitaria pol resultáu porque, na so opinión, "súmense a otra serie de resultaos que muestren que la sociedá asturiana, cuando se-y entruga en concreto pol apoyu a la llingua, siempre se manifiesta favorablemente”. Asimesmo aprovechó pa pidir a la Federación Socialista Asturiana y al PP que "reflexonen" sobre la so postura nel tema de la oficialidá de la llingua asturiana, y que "domestiquen les posiciones que tienen, en referencia a la normalización de la llingua, porque lo llóxico ye que l'apoyen".

Finalmente, dende Unidá Nacionalista Asturiana tamién espresaron el so “contentu pol resultáu algamáu na Escuela Universitaria de Maxisteriu”, afirmando que con esta votación la Universidá d’Uviéu “ta cumpliendo’l so llabor formador” en cuantes que “tien de responder a les necesidaes que se presenten nos centros educativos”. Sicasí, dende la organización nacionalista llamenten qu’esti fechu nun fuera consideráu “normal” dende un entamu, “faciendo falta una votación específica pa l’aprobación de la mención de llingua asturiana”, añadiendo que “mal que-y pese a l’Alministración educativa asturiana l’alumnáu d’asturianu ye cada vuelta más numberosu, y esta situación desixe que l’asignatura seya impartida por un docente con un nivel de formación afayadizu”.

Comentarios

Algamar ámbitos onde tea presente la llingua asturiana ye siempre importante. Norabona a tolos que trabayaron y se movilizaron pa consiguir esti oxetivu. Tamién un exemplu de cómo actuar pa consiguir coses, tendiendo la mano al mayor númberu de xente posible y siempre proyectándose, ensin mieu, na sociedá asturiana.

Contador Estadistiques