Maxisteriu aprueba la Mención d'asturianu

La Escuela de Maxisteriu de la Universidá d'Uviéu va contar con especialidá de Llingua Asturiana nos planes resultantes de la próxima reforma de les sos enseñances. La Xunta d'Escuela aprobó güei por 58 votos a favor, 26 a la escontra y 3 votos blancos, crear la mención d'asturianu, un bloque d'asignatures que van sumar un mínimu de 30 creitos.

   La propuesta, presentada pola Comisión de Docencia, votóse en solitariu, al marxe del restu de menciones plantegaes, nuna sesión monográfica convocada a tal efeutu. Cuatro profesores, Julián Pascual, Esperanza Fernández, Jesús García y el director de Departamentu de Filoloxía realizaron intervenciones a favor de l'aprobación dela mención. Amás, Raquel Rodríguez, una representante estudiantil na Xunta d'Escuela presentó una recoyida de 340 firmes de profesores y estudiantes de Maxisteriu a favor de la creación de la mención. Nun hubo nenguna toma de pallabra contraria, polo que, según ún de los docentes asistentes al conceyu, "nin siquier hubo alderique".
  
Darréu pasóse a la votación, aproximadamente tres cuartos d'hora dempués d'entamada la sesión, col resultáu yá conocíu.
 
   La de güei foi la segunda votación de la propuesta de futures especialidaes de cara a la reforma d'estudios de Maxisteriu que tien llugar na Xunta d'Escuela. La primera, qu'incluyía cuatro menciones ente les que nun figuraba la d'asturianu, regugóse en febreru por amplia mayoría. Pa esta segunda ocasión, la direición de la Escuela decidió convocar dos votaciones: una, de la güei, na que se tomaba la decisión sobre la propuesta de Llingua Asturiana, y otra, que va tener llugar próximamente, na que se va decidir sobre les otres cuatro: Llingua Estranxera, Educación Física, Educación Musical y Educación Especial.
 
   Cola aprobación de la mención de Llingua Asturiana, Maxisteriu ye'l segundu centru educativu de la Universidá d'Uviéu qu'acepta crear una especialidá d'asturianu. Enantes, dio'l pasu la Facultá de Filoloxía, onde la Xunta tamién dio'l so vistu bonu a la creación d'un minor (bloque d'asignatures) de Llingua Asturiana.
 
   De magar la puesta en marcha de dambes especialidaes, los estudiantes de Maxisteriu y Filoloxía que quieran ser maestros (Educación Primaria) o profesores (Educación Secundaria) de Llingua Asturiana van tener que realizar estos estudios reglaos, en llugar de los actuales cursos de postgrau qu'ufierta la Facultá de Filoloxía: Espertu y Especialista.
 
CONCENTRACIÓN
 
   A les puertes de la escuela, dende les 16.00 hores, un grupu de persones, ente los qu'había representantes de tolos sindicatos d'enseñanza, y de dalgunos partíos políticos como Bloque por Asturies, UNA o PCPE, concentráronse convocaos pola Xunta pola Defensa de la Llingua Asturiana, en defensa de l'aprobación de la mención.
 
   Esta organización venía desarrollando una intensa campaña a favor del sí a la propuesta dende que tuviere llugar l'anterior votación, na que nun s'incluyía la propuesta d'asturianu, motivu pol que dirixó dures crítiques a la directora de la Escuela, Gloria López Téllez.
 
   Paralelamente, profesores del Seminariu de Filoloxía Asturiana de la Facultá de Filoloxía unviaron una carta a Maxisteriu, defendiendo la creación de la mención. Pela so parte, tanto'l rector de la Universidá d'Uviéu, Vicente Gotor, como'l propiu conseyeru d'Educación, José Luis Iglesias Riopedre, comunicaron al centru'l so interés en que se creare la especialidá de Llingua Asturiana.

Comparte...                                    

Enllaz permanente