García: “Etiquetamos n’asturianu porque ye la única opción válida pa un productu que se fai n’Asturies”

L’entreguín César García Antuña ye ún de los socios de Cerveza Caleya, la primera artesanal fecha n’Asturies. Etiquetada en llingua asturiana, esta Pale Ale ellaborada en Rusecu yá ta disponible en cerveceríes d'Uviéu, Xixón y Avilés.

La Cerveza Caleya yá ye una realidá. ¿Cómo podría definila?

La Cerveza Caleya ye una Pale Ale, un tipu de cerveza inglesa de fermentación alta y mui llupulada, con matices afrutaos tanto nel sabor como nel arume. Salió a la venta a primeros de xunetu d’esti añu y pudo prebase per primera vegada nel Tolivia Fest, festival de la cerveza de Tolivia, onde tuvo mui bona aceptación.

¿Qué tal recibimientu ta teniendo?

Ta siendo mui bonu y hai opiniones de too tipu, dende aquelles persones que-yos paez un tanto fuerte pol grau d’amargor a otres que-yos prestaría que destacase mas el sabor del llúpulu o de la malta, d’ehí que la receta definitiva de la nuesa Asturies Pale Ale nun no tea del too matizada. Tán modificándose les cargues de llúpulu na coción xugando colos tiempos nos que se-y añaden al mostiu hasta dar col puntu que más nos agrade.

¿Onde se pue consumir nestos momentos?

Anguaño nun son muchos los llugares onde se pue consumir la nuesa cerveza, yá que contamos con una producción bien llendada que nos fai imposible abastecer a tolos llocales que tán solicitándola, polo que pidimos disculpes y un poco de paciencia hasta que garremos el ritmu de producción. Dalgunos de los llocales alcuéntrese en Rusecu, nel conceyu de Sobrescobiu, onde ta la sede de Cerveza Caleya. Tamién en L’Entregu, yá que nós somos d’ehí, y nos la vienen pidiendo dende hai munchu tiempu. El nuesu distribuidor y collaciu David, de La Peñona, que siempre apostó poles bones cerveces n’Asturies, encárgase de llevala a los llocales d’Uviéu, Xixón y Avilés que meyor cuiden la cerveza.

¿Cuándo naz la idea de crear la Cerveza Caleya?

La historia de Cerveza Caleya remóntase al añu 2001, cuando Silvestre, Gonzaga y yo vamos a estudiar a la Escuela de Cinematografía, en Ponferrada. Ellí conocimos a Quique, Enrique Cacicedo, sociu actual de Cerveza Dougall’s. Tres terminar los estudios, les nueses vides dixébrense y principia’l nuesu periplu llaboral dientro del mundu de la farándula. Nun sedría hasta l’añu 2010 cuando volvemos a tener noticies de Quique por mediación d’un amigu suyu que coincide na productora onde trabayábamos. Coméntanos que taba faciendo cerveza artesanal xunto a la so pareya Ana y el so sociu Andrew, fundador de Dougall’s,  nun pueblo de Cantabria nomáu Liérganes. Foi entós cuando decidimos dir a visitalos. Ellos animáronnos y enseñáronnos a ellaborar la nuesa cerveza propia, de lo que tamos eternamente agradecíos.

A partir d’ehí punxímosnos manes a la obra y, al mesmu tiempu que facíemos los nuesos primeros esperimentos, preparábamos el proyeutu y tolos trámites burocráticos que requier el sacar la cerveza al mercáu, lo que nos costó más de dos años. Lo peor de too asocedió pocos meses enantes de salir a la lluz Cerveza Caleya: el nuesu hermanu, amigu y sociu Gonzaga finó nun tráxicu accidente. Pero la vida continúa y l’allegría, el trabayu y la enerxía que Gonzaga tresmitía y que depositó en Caleya fainos siguir alantre col proyeutu con más fuercia y pasión que nunca. 

¿Teníen vustedes una formación previa na ellaboración d’esta bébora o yeren nuevos nel asuntu?

Sinceramente nun teníamos nin idea de cómo s’elaboraba la cerveza hasta que volvimos a reencontranos con Quique, que nos somorgió nesti mundu tán apasionante. Él contónos tolo que sabía, recomendábanos los llibros meyores, les fontes d’información meyores, presentónos a otros productores colos que compartir esperiencies y, ente cerveza y cerveza, daprendimos, daprendemos y siguiremos daprendiendo, porque con cada ellaboración daprendes dalgo diferente.

Nestos tiempos de crisis ye menos habitual la puesta en marcha de proyeutos empresariales como Cerveza Caleya. ¿Foi complicao dar los primeros pasos?

Foi too mui complicao. Llegamos a la conclusión de que la burocracia ta diseñada pa desgastar y facete abandonar cualquier idea emprendedora. Hai que tener muncha paciencia y tar mui bien asesoráu, yá qu’hai trámites que tarden munchos meses en resolvese y que t’impiden dar el pasu siguiente

¿Recibieron dalgún tipu d’ayuda?

Si, recibimos la subvención del Plan Leader del Alto Nalón, de la que tamos mui agradecíos tanto pola parte económica como pol tratu y l’atención que recibimos. 

Un aspeutu especial de la so marca ye l’usu del asturianu nel etiquetáu.

Decidímonos a etiquetar n’asturianu porque pensamos que yera la única opción válida pa un productu que se fai n’Asturies y que se pretende comercializar n’Asturies. Pue ser dalgo importarte pa introducite nel mercáu, pero ha de dir de la mano d’un bon productu.

¿Qué papel han de xugar los empresarios asturianos na normalización del idioma?

Nun sé cual ye’l papel qu’han de xugar otros empresarios. Sabemos cuál ye’l papel que Cerveza Caleya quier desendolcar, que pasa por productos de calidá y por un funcionamientu internu íntegru, sinceru y consecuente colos tiempos que cuerren, ensin dexar de llau la cultura, la tradición, l’idioma, les costumes y l’entornu, al que nos sentimos mui venceyaos.

La imaxe de marca de Cerveza Caleya ye un gallu montés. ¿Ye un ceguñu a Sobrescobiu?

Non sólo ye un ceguñu al conceyu de Sobrescobiu; ye un ceguñu a tol entornu del Parque de Redes, al que tamos peragradecíos por tolo que nos aportó y nos aporta: l‘agua de gran calidá, el paisaxe, la flora, la fauna, etc. Tamién ye un ceguñu a Mansín, el gallu montés sociable que se dexó ver peles cais de Tarna, y una llamada d’atención sobre una especie que ta en problemes serios y que cuerre’l riesgu de desaniciase si nun se protexe’l so entornu.

¿Qué planes tienen na empresa a plazu curtiu?

Los planes de Cerveza Caleya a plazu curtiu pasen por garrar el ritmu de producción, yá que salimos al mercáu nun momentu de muncha demanda y vímonos saturaos en munchos aspeutos. En principio nun tenemos planes d’espansión. Pensamos qu’hai que ser prudentes nesi aspeutu, yá que nun ta la economía pa tirar cohetes. Enantes debemos de recuperar la inversión.