La Xunta d'Escuela de Maxisteriu na que se votará la mención d'asturianu será'l próximu 31 de marzu

|

La Escuela de Maxisteriu convocó pal próximu martes 31 de marzu, a les 16.30 hores, la Xunta d'Escuela monográfica na que se someterá a votación la propuesta de crear una Mención de Llingua Asturiana, según fontes universitaries. La Comisión de Docencia del centru universitariu aconceyóse esta mañana y decidióse por esta fecha, pese a que de primeres taba previsto que la sesión tuviere llugar esta mesma selmana.

   La proposición d'asturianu va votase, poro, al marxe de les otres cuatro menciones (Llingua Estranxera, Educación Musical y Artística, Educación Física y Educación Especial), propuestes pola direición, sobre les que se va decidir n'otra sesión diferente. Los profesores de la xunta tendrán que votar sí o non a una mención de Llingua Asturiana, compuesta d'un bloque d'asignatures que van sumar un mínimu de 30 creitos.

   La presentación d'una propuesta tien llugar tres el conceyu que tán acababantes de caltener cinco profesores que dan clase d'asturianu en Maxisteriu (Ramón d'Andrés, Roberto González Quevedo, Taresa Fernández Lorences, Xulio Viejo y Álvaro Arias Cabal), cola directora de la Escuela, Gloria López Téllez, y col rector de la Universidá d'Uviéu, Vicente Gotor.

   Los cinco docentes mostraron la so "preocupación" pola posibilidá de que los estudios d'asturianu quedaren fuera de les enseñances de Maxisteriu. Según esplicó d'Andrés, mientres el rector mostró una "sintonía total" y una "gran receptividá" hacia la propuesta, Téllez "respetó" la demanda, pero anunció que diba tener que decidilo la Xunta na votación.

Comentarios

Una prueba más del estáu d'esceición pa cola llingua asturiana.
Nun pue inxertase ente les demás propuestes universitaries normales, non -anque tea encamentada pol Rector, dalgo que nun se pue dicir de nenguna otra mención de les propuestes; anque seya un área d'educación y qu'haya 22.000 escolinos que necesiten de profesores formaos curioso-, hai que-y entamar un tribunal d'esceición y face-y un xuiciu separtáu. Como a un condenáu, a un ciguáu.
Ye un intentu por parte de los seutores más reaicionarios de que se vote NON a la desesperada y dar un hachazu a la presencia del asturianu nes escueles, pa esborrialu dafechu de la educación. La rempuesta social ellí, esi día a esa hora, tien de ser exemplar y bultable: NON al apart-heid llingüísticu.

Contador Estadistiques