Trabayadores de Capsa adelanten les xornaes de fuelga al 20 y 23 de marzu "ante la repercusión" del paru del tresporte

|

Los trabayadores de Corporación Alimentaria Peñasanta (Capsa) decidieron adelantar la convocatoria de fuelga a los díes 20 y 23 de marzu, "ante la repercusión" del paru del tresporte, previstu de magar el día 25 de marzu y con carácter indefiníu, según apuntaron fontes sindicales a Europa Press.
 
Asina, s'adelanten les xornaes de fuelga previstes de primeres pa los díes 24 y 26 de marzu. "La decisión tomóse esti vienres, cuando se diba presentar la convocatoria, al conocer que'l sector de tresporte decidía dir a la fuelga", esplicaron representantes de los trabayadores de Capsa.
 
Sicasí, la intención reivindicativa de les dos xornaes de fuelga sigue calteniéndose pa los trabayadores de Capsa ante lo que califiquen una situación "complexa" per parte de la empresa.
 
Amás, los responsables sindicales indicaron que mañana martes 17 de marzu s'aconceyen el comité d'empresa y representantes de la compañía alimentaria pa buscar un averamientu. De la mesa manera, prevése un conceyu'l xueves nel Serviciu Asturianu de Solución Estraxudicial de Conflictos (Sasec) pa tratar la negociación rellacionada cola convocatoria de fuelga.
 
El comité reclama una subida del IPC real más un puntu, y la empresa propón una subida del IPC a cambiu de que los trabayadores aceptaren trabayar dos domingos siguíos. Los emplegaos calquen en que "nun ye un conflictu por dineru, sinón pa defender los puestos de trabayu y la meyora de les condiciones llaborales, especialmente de les categoríes inferiores eventuales y les nueves incorporaciones" ante una propuesta que consideren "l'intentu de crear una subcategoría".

Contador Estadistiques