La Plataforma de Docentes d'Asturianu pide la creación de la especialidá y la convocatoria d’oposiciones

|

La Plataforma de Docentes d'Asturianu, acabante crear y qu'axunta a profesores y maestros de llingua asturiana, fixo llegar a Asturies.com el documentu cola so posición respective al conflictu que sobre’l so estatus surdió tres la sentencia del Tribunal Supremu que declara illegal la so situación llaboral. Piden la creación de la especialidá de llingua asturiana y la convocatoria d’oposiciones.

El documentu cuenta col sofitu de les asamblees d'interinos d’asturianu celebraes hasta agora, y anguaño englobaos nos centros educativos nes denominaes “plantíes funcionales”, yá illegales tres la sentencia del Tribunal Supremu. Nesti documentu, los profesores d’asturianu y gallego-asturiano demanden a la Conseyería una serie d’actuaciones qu’equiparen al asturianu col restu de les asignatures.

Los docentes afiten que “a raíz de la sentencia del Tribunal Supremu qu’obliga a la desaparición de les plantiyes funcionales y pasar les places a plantiya orgánica, la situación pa los docentes que ponen escuela d’asturianu y de gallegu-asturianu cambia d’una manera irreversible. Y puede haber cambios positivos o cambios negativos dependiendo de la estratexa que’l colectivu de docentes de llingua asturiana tome”.

Por eso, la Plataforma de Docentes d’Asturianu desixe’l “compromisu de les fuerces sindicales, de los partíos políticos y de la sociedá civil asturiana, a que s’axunten conxuntamente a esta petición, que nun pretende otro que dignificar la situación del idioma asturianu nel sistema educativu y dar la oportunidá de que los docentes sigan exerciendo’l so trabayu nun númberu bien significativu de casos”.

Según la Plataforma de Docentes d’Asturianu, los pasos a siguir seríen, per esti orde, los que vienen darréu; la “creación y inclusión de les especialidaes de Llingua Asturiana y de Gallegu-asturianu nel Catálogu de puestos de trabayu”;  la “dotación de places de llingua asturiana nes plantiyes orgániques de tolos centros”;  “convocatoria d’oposiciones”, y como últimu pasu nel procesu un “concursu de tresllaos”.

Dende la Plataforma insisten en “qu’esti ye l’orde amañosu porque de nun ser asina y pasar a vindicar solo la catalogación y el concursu, podríemos provocar que desapaecieren un montonáu de puestos de trabayos sin que los trabayadores tuvieren la oportunidá, como n’otres situaciones de conflictos llaborales, de siguir exerciciendo’l so llabor docente y que nun s’accediera a esos puestos de trabayu como nel restu d’especialidaes”.

Asturies.com ufre a los sos llectores, adxuntu a esta noticia, el documentu completu de la Plataforma de Docentes d’Asturianu.

AdxuntuTamañu
Microsoft Office document icon Plataformadocentes.doc29.5 KB
Contador Estadistiques