Fernández Rancaño: “Participar nel Villa de Candás ye un arguyu pa cualquier banda de gaites”

Los díes 22 y 23 de xunetu va celebrase la decimoquinta edición del Festival de Bandes de Gaites Villa de Candás. José Manuel Fernández Rancaño (Outonais, 1969) ye’l presidente de la Banda Gaites Candás dende’l mes d’avientu.

¿Qué bandes van participar esti añu nel Festival de Gaites Villa de Candás?
 
Nesta edición vamos a disfrutar cola multitudinaria banda Bagad Roñsed-Mor, cuatro años campeona de la Bretaña francesa; la dos veces vencedora de la Liga Galega, y amiga de nueso, Banda Gaites Villaviciosa El Gaitero, que cumple 25 años; l’Agrupación Sacaires de Tarragona, con 30 promeses moces con poco tiempu de trayeutoria pero que yá tocaren nel Vaticanu pal Papa; amás de la campeona d’Asturies, Banda Gaites Candás, y los Escolinos de la Banda Gaites Candas. La nuesa banda nació nel 1990 col nome d’Asociación Cultural Banda Gaites Candas, col oxetivu de dedicase al estudiu, contribución y difusión de la cultura tradicional asturiana. El nuesu oxetivu principal ye ayudar a incrementar el nivel cultural no referente al patrimoniu musical, folclóricu y tradicional d’Asturias. La banda tien anguaño más de 25 gaiteros y percusionistes, y alrededor de quince escolinos que se formen na nuesa Escuela de Música Tradicional, lo que nos asegura una cantera de xente mozo que s’incorporen ca añu a la banda manteniendo’l so nivel actual d’interpretación y calidá.
 
¿Pue adelantame'l programa del certame?
 
Va haber dellos pasucais peles cais de la villa, el primeru d’ellos el vienres, día 22, a les 19.30 hores cola actuación de la Bagad Roñsed-Mor y l’Agrupación Sacaires de Tarragona pa, depués, a les 23 hores celebrar una nueche de gaites na plaza de La Baragaña. El sábadu 23 va haber un pasucais a les 13.30 hores cola participación de Sacaires de Tarragona y A Carballeira, y otru, a les 19.30 hores, cola Bagad Roñsed-Mor y la Banda Gaites Villaviciosa El Gaitero. La cita principal del certame va ser a les 23 hores nel parque de Les Conserveres, onde va celebrase’l XV Festival de Gaites Villa de Candás.
 
¿Cuál ye’l momentu más esperáu del Festival?
 
Amás de la nueche del Festival, yo creo qu’a la xente presta-yos muncho la Nueche de Gaites, onde tolos participantes actúen en La Baragaña.
 
 
El Festival de Bandes de Gaites Villa de Candás cumple 15 años y yá ye una cita más que consolidada.
 
Sí, el Festival consolidóse como ún de les cites de referencia del branu candasín y ye una ferramienta importante p’averar a la sociedá los soníos d’esti instrumentu míticu y les formes nueves de facer música cola gaita. Ésti nació nel 1997 nun momentu de puxanza de la la cultura popular tradicional nel que nun había una cantidá importante de festivales de bandes de gaites. Gracies al direutor d’entós, José Ángel Hevia, agora Gaiteru Mayor de la Banda Gaites Candás, y a tolos miembros de la banda y de la direutiva, foi posible esta aventura qu’agora cumple 15 años.
 
Sicasí, l’añu pasáu tuvieron problemes pa celebralu.
 
La crisis afeutó a tol mundu, incluyíu’l Festival, que tuvo qu’asumir una perda de la subvencion del ayuntamientu d’un 20 por cientu que, sumáu a les empreses grandes de Carreño que nun quixeron collaborar ni collaboren col Festival –pese a ser un conceyu con munches compañíes– fixo que tuviera al borde de la desapaición. L’apoyu económicu de tolos establecimientos hosteleros, tiendes, agrupaciones, entidaes particulares, de los habitantes de Carreño y del Ayuntamientu fixo que’l Festival llegara a bon puertu. La xente del conceyu fixóse socia del Festival, mercó camistes pa sofitanos y metió perres nes huches que colocamos esti añu en negocios de Candás como esperiencia piloto. Amás hai que tener en consideración a les bandes que decidieron venir gratis.
 
¿Foi difícil echar a andar un Festival d’estes carauterístiques?
 
Too entamu ye complicáu y más embarcase nuna esperiencia como ésta que se marcó consolidar un proyeutu na que la cultura asturiana tuviera una acoyida amplia y que, amás, fora escaparate de les tradiciones de nueso.
 
¿Cuál foi l'oxetivu que teníen al entamar el Villa de Candás?
 
Servir como potenciador económicu del conceyu y, de manera especial, fomentar l’actividá turística, servir de vehículu de comunicación ente Asturies y el restu de los países atlánticos con protagonismu pa los nomaos países celtes. D’esta manera algamamos que Asturies ruempa’l so aislamientu natural.
 
¿Da muncho trabayu organizalu?
 
Detrás de dos díes de Festival hai munchos meses de trabayu que principien nel momentu nel qu’acaba’l Festival anterior .La comisión del Festival ta compuesta por miembros de la direutiva y músicos, pero son munchos los socios que nos ayuden, al igual que familiares, en loxística, en cocina, na distribución de comíes, en llimpieza y n’acondicionamientu del agospiamientu de les bandas, asina como nel treslláu y montaxe de las lliteres onde collaboren tamién tolos miembros de la banda. Nel repartu de cartelos por Asturias échanos una mano la xente de la Oficina de Turismu, que reparte per toles oficines de la comunidá cartelos del Festival. Nun se pue poner preciu a toes estes collaboraciones
 
¿Cómo seleicionen a les agrupaciones participantes?
 
El direutor y los músicos xueguen una baza importante na composición del cartelu del Festival, yá que son ellos quienes aconseyen sobre qué bandes podríen venir Festival. Llueu ye la comisión la que se pon en contautu con elles pa conocer la disponibilidá d’éstes. Hai casos nos qu’hai bandes que nos llamen a nós pa venir, pero munches veces éstes nun tienen la calidá musical qu’esiximos o’l so caché ye mui alto pa les nueses posibilidaes.
 
¿Qué supón pa una banda de gaites participar nel Villa de Candás?
 
Al ser el Festival de Bandes de Gaites más antiguu, ye una medaya, un distintivu y un arguyu pa destacar nel currículum de cualquier banda.
 
¿Marchen con un bon recuerdu d’Asturies?
 
L’ambiente festivu qu’arrodia’l Festival fai que toles bandes marchen con un bon sabor de boca. A ello tamién ayuda que los vecinos arropen a les agrupaciones y que-yos den el calor d’un aplausu que tienen bien merecíu. Son tan bonos momentos los que trae’l Festival que seria imposible alcordarse de toos.
 
¿Cuál va ser el futuru del Festival?
 
Trataremos meyorar ca añu un poco más la calidá del certame anterior, trayendo les bandes más destacaes, y les mas llamatives tamién. D’igual forma vamos tratar de retomar la Nueche Celta que se perdió hai unos años, pero pa ello necesitamos más patrocinadores y l’ayuda tanto del Ayuntamientu como del pueblu de Candás, que ye en quién pensamos nós al entamar el Festival.