La concentración “Pol futuru d’Asturies” suma nuevos apoyos

Setiembre 6, 2010 por Xicu Ariza

La concentración “Pol futuru d’Asturies” del próximu 8 de setiembre sigue sumando apoyos. Esti fin de selmana agrupaciones polítiques llocales de Carreño, Corvera y Nava y la organización soberanista Fai! declararon que van dir al actu.

Unión Independiente de Carreño (UICA), Asturianistes por Nava (APN) y Más Corvera, fueron les tres últimes formaciones polítiques en sumase a la concentración “Pol futuru d’Asturies” el día 8 nos Xardinos d’El Náutico de Xixón. Nel actu, convocáu pola Plataforma Unitaria 8 de Setiembre, tamién van tar el Bloque por Asturies, UNA y AA.

“Dende Carreño apoyamos que se construya una alternativa al bipartidismu de PSOE-IU y PP”, declaró Ramón Artime, portavoz de UICA. Esta fuerza política ye la tercera nel ayuntamientu candasín, con tres conceyales.

D’otra banda, APN, agrupación naveta venceyada a UNA que tien dos conceyales, expresó’l so sofitu a la iniciativa y señaló que van acudir a la concentración el conceyal Emilio Ballesteros y el secretariu xeneral Nisén Díaz, ente otros. Tamién Más Corvera, agrupación llocalista de reciente creación, anunció su adhesión a la plataforma y su presencia nel actu del 8 de setiembre.

Fai! se suma
La organización d’izquierda soberanista Fai! vien tamién d’asoleyar al traviés d’un comunicáu la so participación na convocatoria de Xixón. Anque con crítiques a la fecha del 8 setiembre, el colectivu valora positivamente l’actu “como día de rempuesta al cuadonguismu españolista impuestu, a la negación de los derechos coleutivos del pueblu asturianu y al retrocesu social y esfarrape medioambiental que siguimos careciendo metanes de la crisis capitalista”.