Colunga pide evitar un “gravísimu atentáu” cultural en Lancia

El Diputáu y Portavoz del Grupu Parllamentariu del Bloque por Asturies, Roberto Colunga, vien d’unviar cartes a autoridades públiques d’España, Castiella y Lleón y Asturies, na que pide midíes pa evitar un “gravísimu atentáu” en ciudá de Lancia.

Énte’l impactu que les obres de l’autovía A-60 puedan tener sobre’l yacimientu arqueolóxicu astur de la ciudá de Lancia, Roberto Colunga amosó la so preocupación unviando cartes al Ministru de Fomentu y a la Ministra de Cultura del Gobiernu d’España, a les Conseyeres de Cultura del Principáu y de la Xunta de Castiella y Lleón, y al Director Xeneral de Patrimoniu Cultural de la Xunta de Castiella y Lleón.

“Si nun se tomen midíes efectives, en poco tiempu vamos ver como desapaez baxo l’asfaltu una zona de valor incalculable pal conxuntu de la humanidá”, denunció’l Diputáu del Bloque por Asturies. Asina ye que pidió a les instituciones y autoridaes compotentes intervenir pa evitar lo que calificó como “gravísimu atentáu contra’l patrimoniu de la humanidá”.

Ciudá clave pal mundu astur
Ciudá de Lancia ye ún de los asentamientos humanos más grandes de la zona astur, con importancia incuestionable nel mundu prerromanu del noroeste del Estáu español. Nella alcontráronse restos del paleolíticu inferior, que sofrieron un espoliu y saquéu permanente demientres el sieglu XX, ensin que les instituciones responsables lo protexeran. En 1994 foi declarada zona y bien d’interés cultural.

Comparte...                                    

Enllaz permanente