Izquierda Abertzale y EA tresmiten la posibilidá d'un altu'l fueu d'ETA

Setiembre 3, 2010 por E.P. / Redacción

La izquierda abertzale y Eusko Alkartasuna tresmitieron a partíos, sindicatos y otros colectivos de nacionalismu vascu un documentu nel que se contemplaría la posibilidá d'un altu'l fueu d'ETA baxo verificación internacional.

Nun comunicáu conxuntu, EA y la izquierda abertzale precisaron qu'esi documentu, entituláu 'Acuerdu sobre les condiciones mínimes y suficientes pal desarrollu del procesu democráticu', ye'l desarrollu del testu 'Bases d'un Acuerdu Estratéxicu ente Fuerces Polítiques Independentistes', el denomináu acuerdu 'Lortu Arte', firmao por ambos el pasáu 20 de xunu nel Palaciu Euskalduna.

Poro, señalaron que ye un testu redactáu poles dos fuerces polítiques firmantes del citáu acuerdu y tien como oxetivu "superar l'actual situación política vasca y llograr qu'Euskal Herria entre nuna nueva fase caracterizada pola paz y la normalización política".

Coles mesmes, señalaron que, tal como s'anunció tres la firma del documentu 'Lortu Arte', l'acuerdu empezó a desarrollase, "siempre cola mirada puesta en llograr l'oxetivu declaráu d'algamar l'Estáu vascu independiente pente medies de l'acumulación de fuerces soberanistes que desarrollen una estratexa de confrontación democrática colos estaos español y francés".

Amás, precisaron que, nel testu, desarróllense les condiciones qu'EA y la izquierda Abertzale proponen al restu de fuerces polítiques, sociales y sindicales vasques "pa superar la situación política que sufre Euskal Herria y caminar hacia una nueva fase na que se respeten tolos derechos humanos, políticos y civiles del conxuntu de la ciudadanía vasca". Nesti sen, apuntaron qu'ambes formaciones empezaron yá a estudiar la so propuesta con otros partíos, sindicatos y colectivos.

Propuestes del documentu
El documentu consta de trés partes, según publica 'El Correo' na so edición de güei, na que se detalla'l conteníu del testu ellaboráu pola Izquierda Abertzale y EA. Ambes formaciones planteguen una "fueya de ruta" na que se describe como "permanente" el posible altu'l fueu a decretar por ETA, anque s'inclúi la figura de la "verificación internacional".

Amás, ente otres cuestiones plantégase la derogación de la so illegalización, l'averamientu de los presos d'ETA y poner fin a los xuicios contra les organizaciones del entornu de la banda terrorista, asina como trabayar pol arreglu de "toles" víctimes.

Coles mesmes, la izquierda abertzale y EA plantegen la creación d'una o delles meses multipartites nes que participen toles formaciones vasques y pretende favorecese un procesu de diálogu ente'l Gobiernu y ETA "sobre les consecuencies del conflictu" pal que se refuga l'usu de los instrumentos coercitivos del Estáu" pa "influyir na negociación".

Comparte...