La XXVII Noite Celta de Porcía celébrase esti sábadu

La Noite Celta de Porcía llega esti sábadu 28 d’agostu a la so vixésimoséptima edición. Destacaos nomes del folk asturianu y internacional van dase cita n’El Franco pa esparder la música de raigañu na nueche celta más veterana d’Asturies.

La representación asturiana va aportar con Felpeyu y DRD, dos de les bandes más reconocíes del nuesu folk; el grupu llocal Cádaba, nomináu al Premiu al Meyor Cantar na so cabera edición; y la banda de gaites naviega La Reina del Truébano. El prestisoxu curdionista David Munelly va poner el toque irlandés al conciertu.

El campu de l’Alameda de Porcía ye’l llugar nel que va celebrase esta XXVII Noite Celta. Dende les 23 hores entamarán les actuaciones gratuites y, como cada añu, la organización va poner sardines a la plancha a disposición de los asistentes.

La más veterana d’Asturies
La Noite Celta de Porcía ye’l festival folk más vieyu d’Asturies. Dende 1983 lleva axuntando nel conceyu d’El Franco a grupos folk pernomaos del Arcu Atlánticu como Llan de Cubel, Luar na Lubre, Fred Morrison o Tamalin.

Comparte...                                    

Enllaz permanente