Les escritores del Navia-Eo dominen lo infantil meyor que los homes

Les escritores en gallego-asturianu camienten que nun hai diferencies ente la so lliteratura y la de los homes. Con too, afirmaron que dominen meyor el campu de la lliteratura infantil.

Culturlingua pesllóse ayeri en Tapia con un alderique sobre la escritura en gallego-asturianu y el papel de la muyer. El mesmu tuvo moderáu pola filóloga Ruth González y cuntó cola intervención de les escritores María José Fraga, Aurora García Rivas y Aurora Bermúdez.

Toes reconocieron que nun sienten diferencies por ser muyeres y tampoco camienten que’l so trabayu seya estremáu al de los homes. A lo llargu del alderique punxeron de manifiestu que les escritores se atreven con too tipo d’estilos lliterarios. Sicasí, tovía nenguna de les autores espublizó un llibru de lliteratura xuvenil

Aurora García Rivas aseguró que ye un campu mui peligrosu y nel que nun s’atreve a probar suerte. Fraga tamién considera que ye una aventura arriesgada y amás asegura qu’actualmente “ye difícil facer dalgo p’adolescentes de calidá”. Del mesmu pensar ye Aurora Bermúdez quien se manifestó alloñada de los esmolecimientos de los adolescentes: “Nun pueo averame d’una mena que les paezca aceptable”.

Con too, les escritores falaron del bon momentu que vive la creación en gallego-asturianu yá que “la xente perdió’l mieu a publicar”. Amuesa d’ello ye que les tres escritores presentes tienen llibros en fase de producción y a puntu de salir al mercáu.

Anque afirmen que nun hai diferencies ente los autores masculinos y los femeninos, sí qu’hai un estilu nel que les muyeres dominen: la lliteratura infantil. Aurora Bermúdez, docente de profesión, desplicó que nel so casu escribir pa neños partió d’una necesidá’l alncontrar pocos recursos pa les clases de gallego-asturianu na escuela. Sicasí añadió que “escribir pa neños ye más difícil porque ye un públicu percríticu, ellos nun tienen dobleces y si nun-yos presta van dicilo”.