Xune Elipe

Reflexón y acción nel nacionalismu asturianu

Vengo asistiendo como espectador a los debates, espiriques y reflexones que dende hai dalgún tiempu vienen produciéndose nel, vamos llamalo, “magma” nacionalista asturianu. Emplego esti términu polo que tenemos de masa informe, desectructurada, indefinida… que nun acaba de cuayar. Arrecostinamos años y años de derrotes, errores y frustración, pero nos últimos tiempos toi percibiendo un cambiu de ciclu que m’abulta perinteresante; seya polo que seya (madurez o necesidá), el casu ye que tamos delantre un escenariu inéditu na hestoria recién del nuestru movimientu. Quiero agora convertime en partícipe d’esta reflexón xeneral y facelo dende la opinión estrictamente personal, con respetu hacia toles organicaciones y persones (que yá sabemos la sensibilidá que nos gastamos los nacionaliegos asturianos) y col enfotu d’aportar dalgo al debate (quiciabes aciertos, quiciabes menudencies).
    
La coyuntura política xeneral pela que trescurre l’actualidá estatal vien marcada por dos tendencies claramente definíes, d’una banda una llamada a la vuelta al centralismu, al Estáu-nación como alministración fundamental, y d’otra la resistencia de los mal llamaos “nacionalismos periféricos” (¿periféricos? ¿de quién?), fundamentalmente’l vascu y el catalán. Nesta situación Asturies, a la que nós entendemos como comunidá nacional, lleva les de perder; l’avalancha centralista y fondamente españolista que nos vien enriba amenaza con llevar per delantre los pocos llogros consiguíos nestos trenta años. Ensin un muriu de contención (no cultural, no llingüísticu, no medioambiental, etc.) corremos un peligru seriu de desapaecer como comunidá humana diferenciada. Y precisamente tenemos de ser los nacionalistes (o aquellos que tenemos una visión d’Asturies como país) los que diseñemos y construyamos esi elementu que nos faiga albidrar un futuru meyor pa la nuestra tierra.
    
La mocedá del movimientu nacionalista asturianu probablemente fuere la causa de los munchos errores cometíos, la nuestra inesperiencia política y la terminoloxía emplegada podríen ser causa del alloñamientu y incomprensión que la sociedá asturiana nos “regaló” toos estos años. Ye tiempu de principiar a facer política coles blimes que tenemos, apegada a la realidá del país, que nun ye otra qu’una población acomodada y a gustu col estatus que tien, con una personalidá fuerte, sí, pero ensin percibir qu’ésta pue tener fecha de caducidá. Tenemos d’iguar una estratexa en función de la nuestra debilidá como movimientu, dende la insignificancia política y la invisibilidá que carecemos. Mentanto nun nos decatemos d’esto nun hai nada que facer, mentanto sigamos ensin enteranos de que la nuestra capacidá de respuesta nun va más allá d’emitir comunicaos (munches veces con un llinguaxe grandilocuente más averao a la ciencia-ficción qu’a otra cosa) nun vamos dir a nengún llau.
    
Los últimos acontecimientos nel micromundu nacionalista tán dexando ver la posibilidá d’una pequeña esperanza. Les tres principales organizaciones paez qu’empiecen a salir de la burbuya y enfrentase a la realidá. Andecha Astur (o pa nun ferir a naide, los qu’utilicen estes sigles) lleva años d’esboroñamientu con fechos tan llamentables como’l procesu xudicial pol propiu nome; Unidá Nacionalista Asturiana nun foi quien a xenerar les espectatives esperaes, con errores de bultu como lo de los avales electorales; y el Bloque por Asturies tuvo hasta hai bien poco “desapaecíu en combate” somorguiáu nel gobiernu, con una perda constante de credibilidá. Ésta, nun nos engañemos, ye la realidá. Poro, ye tiempu d’apelar a la responsabilidá y, anque suene pasáu de moda, al patriotismu. Tenemos de ser quien a crear espacios comunes d’acción, vaigamos allanando’l camín: nun-y deamos baces al contrariu, respetémonos, nun gastemos tiempu y esfuerzu en debilitar al que tenemos al llau y encarémonos col d’enfrente. ¿Modelu? Que si’l Bloque Nacionalista Gallegu, que si les Candidatures d’Unidá Popular de Cataluña… el tiempu y el grau de converxencia van dir marcando’l camín, pero echemos a andar. Solucionaos los nuestros problemes internos enanchemos la nuestra posible masa social, faigamos un nacionalismu constructivu qu’atraya a sectores heteroxéneos de la sociedá asturiana (por exemplu a los inmigrantes, falándo-yos de derechos ciudadanos). Convenzamos a los trabayadores de que defender los puestos de trabayu ye lluchar pol futuru de los sos fíos (prexubilaciones=destierru). Dexemos la reivindicación llingüística en manes d’organizaciones cíviques unitaries como la Xunta pola Defensa de la Llingua y apoyemos el so llabor, “lliberándonos” d’esa xera. Yá sabemos que na cai movémonos bien, tamos a gustu, pero agora ye’l tiempu d’entrar nes instituciones y facer ver a la población asturiana qu’hai otra manera d’entender y facer política. Pero seyamos conscientes de que por nós solos nun vamos ser quien a ello.
    
Esta refundación o rexeneración del nacionalismu asturianu namás pue venir dende la izquierda, y sobremanera nes condiciones actuales, con una crisis fonda del sistema económicu capitalista que, como siempre, tamos pagando les clases populares. Soi de los que piensen que’l nacionalismu asturianu o ye d’izquierdes o nun va ser. Los elementos que formen la nuestra personalidá nacional (económicos, culturales, llingüísticos…) tienen un estigma de clase mui fondu, tanto que ye practicamente imposible separtalos. Y ¿qué queréis que vos diga? el nacionalismu pol nacionalismu, el nacionalismu como ideoloxía, el nacionalismu como fin (y non como mediu)… dame munchu mieu.
    
Los que yá llevamos tiempu nesta hestoria tenemos de ser lo suficientemente responsables como pa nun tresmiti-yos los nuestros errores, les nuestres zunes, les nuestres animadversiones, a les xeneraciones nueves que s’incorporen al nacionalismu. Nun-yos deamos n’herencia un movimientu abocáu al fracasu. Pol bien d’ellos y del pueblu asturianu.

Comparte...                                    

Enllaz permanente