El Día d'Asturies nel Esterior va celebrase en Menorca

|

Areces va encabezar la delegación del Día d’Asturies nel Esterior, que tendrá llugar el 9 y 10 de setiembre en Mahón (Menorca) y que cuntará con Victor Manuel y Héctor Braga.

La Viceconseyera de Seguridá y Emigración, Teresa Ordiz Asenjo, presentó esta mañana nel stand del Principáu na Feria Internacional de Muestres (FIDMA) el programa d'actos que va tener llugar en Mahón (Menorca), los díes 9 y 10 de setiembre pa celebrar el Día d'Asturies nel Esterior.

En primer llugar la Viceconseyera destacó que, nesta ocasión, el Gobiernu asturianu va tar representáu pol Presidente del Principáu, Vicente Álvarez Areces, a el que van acompañar la Conseyera de Presidencia, Xusticia ya Igualdá, María José Ramos Rubiera, y la Directora de l'Axencia Asturiana d'Emigración, Begoña Serrano Ortega.

Xuntu con ellos, responsables del Gobiernu balear, del Consell de Menorca y del Conceyu de Mahón, asina como del Centru Asturianu de Menorca y d'otros Centros Asturianos de distintes partes d'España, van tomar parte nestos festexos que pretenden averar a la colonia emigrante la celebración del Día d'Asturies.

Tocantes a la programación, la Viceconseyera esplicó que los actos, que coinciden amás coles fiestes patronales de Mahón, van estremase en dos partes. El día 9 va tener llugar la parte más festiva y va xirar al redor del stand que'l Centru Asturianu de Menorca pon toos los años y nel que podrá tastiase la gastronomía asturiana. Al par d’él, la Sociedá Rexonal de Turismu va distribuyir diversu material promocional d'Asturies.

Pela nueche, l'asturianía va dexase sentir nun conciertu nel que, amás de cuntar cola participación de los alumnos de les secciones de baille y de gaita de la Escuela d'Asturianía, van actuar dos importantes figures musicales: Víctor Manuel y Héctor Braga, que comparten orixes mineros, yá que unu ye de la cuenca del Caudal y otru de la del Nalón.

La Viceconseyera destacó'l vagar que dambos artistes amosaron dende un principiu a collaborar, participar y compartir cola colonia asturiana asitiada en Menorca esti día tan especial, estimándo-yos la so participación.

El día 10 va ser la vez del actu oficial, que va tener llugar a les 12:30 hores nel salón de Plenos de la sede del Consell de Menorca en Mahón, un edificiu históricu onde tola colonia asturiana y los representantes de los Gobiernos asturianu y balear van axuntase pa celebrar el Día d'Asturies nel Esterior. Los actos van concluyir con una espicha popular entamada pel Centru Asturianu de Menorca y que va tener llugar na Plaza de la Conquista.

El Día d'Asturies nel Esterior entámase de forma rotativa ente los Centros Asturianos allugaos n'España, nel restu d'Europa y n'América. Desque empezó a celebrara fueron yá sedes del Día d'Asturies nel Esterior: Madrid, Buenos Aires, Bruxeles, A Coruña, Laussane en Suiza y los centros asturianos de Chile.

 

Contador Estadistiques