El Gobiernu catalán nun va cambiar lleis aprobaes nel so Parlamentu

El vicepresidente del Gobiernu catalán, Josep Lluís Carod-Rovira, aseguró que'l Gobiernu de Cataluña "nun va cambiar" nenguna llei aprobada pol Parllamentu autonómicu.

En declaraciones a RAC 1 recoyíes per Europa Press, dixo que'l presidente de la Generalitat, José Montilla, fixo esta afirmación na xunta del Conseyu Executivu del martes.
 
Dixo que toles lleis aprobaes nel Parllamentu catalán porque l'Estatut dexábalo, nun se van cambiar anque agora nun entren tres el recorte. "Y si mos tienen que llevar a los tribunales, que lo faigan", sorrayó.
 
El vicepresidente afirmó que nun se puen "facer de menos" los preseos que-y da  l'Estatut a Cataluña. "Ensin l'Estatut, nun tenemos nada", dixo, considerando inviable la posibilidá de facer otru Estatut. "Lo próximo que fadrá Cataluña nun va ser un Estatut, va ser otra cosa", aneció.
 
Carod sorrayó que na manifestación del sábadu la ciudadanía dixo "munches coses", ente elles que "quería más", y señaló que l'alderique yá nun ye ente autonomía y federalismu, sinón ente federalismu ya independencia.
 
Sorrayó que l'independentismu alicó y que se tien que facer tresversal, porque "una nación constrúyese dende toles ideoloxíes". Carod sorrayó que nun va haber independencia catalana ensin l'área metropolitana de Barcelona y destacó que "enxamás como agora viérase la independencia como una posibilidá".
 
Al respective de la sentencia del TC, afitó que publicar la sentencia'l día antes de la manifestación ye "un xestu de fachenda". Dixo que'l TC nun tocó aspeutos como les seleiciones deportives catalanes y dalgún otru aspeutu "perimportante".
 
ERC
 
Sobre'l fechu de que'l presidente del Parllamentu catalán, Ernest Benach, seya'l númberu 2' d'ERC por Barcelona a les próximes eleiciones, dixo que ye una decisión del partíu que se tien que respetar. Sicasí, dixo que "por prudencia, hai momentos que ye meyor callar".
 
Almitió que-y supo mal nun dir nes llistes depués de tar "tola vida" nel partíu, pero que dalguna cosa va facer "dientro del llugar y la plataforma más afayadiza pal país".
 
Preguntáu sobre si se plantegó salir d'ERC, dixo que "naide pue refugar nada nesta vida", como tampoco'l fechu de quedase, anque dixo qu'esto nun ye lo importante. Y dixo que "nun va tracamundiar la direición del partíu con unes persones concretes col conxuntu de militantes y votantes d'un partíu".