L'asturianu va quedar marxináu nel Senáu por nun ser oficial

|

El Senáu va aprobar esti mes la reforma del so Reglamentu p'ampliar l'usu de les llingües autonómiques, l'asturianu va quedar fuera de la norma al nun ser oficial.

Cola reforma del Reglamentu van poder escuchase nos Plenos los idiomes oficiales del Estáu, anque namás nel debate de les mociones y non nes sesiones de control al Gobiernu. La iniciativa va entrar en vixencia'l 2011, pa dar tiempu a reorganizar el Presupuestu de la Cámara y qu'esti pasu nun cueste un euru más en plena crisis económica y coles cuentes públiques rebaxaes.
  
La Diputación Permanente del Senáu tendrá qu'autorizar que nel mes de xunetu se trabaye en comisión, como solicitaron los defensores de la reforma, 34 senadores de tolos grupos parlamentarios, nun siendo del PSOE y del PP. En concreto, na Comisión de Reglamentu, que podría reunise na selmana del 12 al 16 de xunetu.
  
Si caltién el consensu qu'esiste ente tolos grupos menos el PP, d'esa comisión va salir un dictame que podría aprobase la selmana siguiente, nel Plenu previstu pa los díes 20 y 21, informaron a Europa Press fontes parlamentaries.

Enmiendes presentaes
  
Tres dellos años de declaraciones d'intenciones, un grupu de senadores rexistró una propuesta pa reformar el Reglamentu y que el vascu, el gallegu, el catalán y el valencianu se sientan más allá de la Comisión Xeneral de Comunidaes Autónomes. Ésti ye l'únicu foru parllamentariu nel qu'estes llingües puen usase, puesto que ye l'únicu tamién nel que puen participar si quieren los Gobiernos autonómicos.
  
Pese a que les pretensiones nacionalistes yeren muncho más ambicioses -llevar les llingües a la vida ordinaria de la Cámara Alta, incluyíos los debates col presidente y los ministros-, almitieron la llenda socialista de les mociones pa dar polo menos un pasu y que seya, amás, nos Plenos, centru de la vida parllamentaria.
  
El PSOE tamién presentó una enmienda pa que la midida entre en vixencia l'añu qu'entra, pa buscar nel Presupuestu actual de la Cámara'l dineru col que pagar a los traductores que van ser necesarios. L'oxetivu ye que nun cueste nin un euru más. Nengún partíu presentó nenguna moción defendendo la presencia del asturianu nel Senáu.
 
El PP refuga la midida
  
El PP ye l'otru grupu que presentó enmiendes, nel so casu, pa dar validez de conteníu a una propuesta a la que s'oponen dafechu. Al so xuiciu, la Constitución dexa claro que l'usu de les llingües cooficiales tien que llendase al ámbitu de la so comunidá autónoma y les sos instituciones.
  
Según defende'l PP, la Cámara Alta representa a tol pueblu español, polo que la so actuación tien que realizase "en términos que facilite la comprensión por tolos españoles". "Y poro, ha desarrollase en castellán", calca, antes d'alvertir que, en casu contrariu, taría "privándose a parte del pueblu español de la posibilidá de conocer, y entender los términos en que se desarrolla'l debate de los sos representantes".
  
La iniciativa va recibir nel Plenu del Senáu otru votu en contra, el de la representante d'UPN María Caballero, miembru del Grupu Mistu, que nun se presentó.

Contador Estadistiques