Pablo Rodríguez Medina gana’l XIII Concursu de Cuentos pola Oficialidá

|

Pablo Rodríguez Medina foi el ganador del XIII Concursu de Cuentos pola Oficialidá del Asturianu, cola obra ‘Aproveciendo de fraxilidá’. El primer premiu ta dotáu con 800 euros.

L’autor yá ganare esti mesmu concursu nos años 2002, 2003 y 2007. El segundu premiu, dotáu con 500 euros, foi pal cuentu 'Les circunstancies', de Ricardo Candás Huerta, y Xuan Carlos Crespos Lanchas algamó’l tercer premiu, al que se-y apurren 350 euros, con “Cazumbre”.

La entrega premios va tener llugar na Casa Conceyu de Bimenes, allugada en Martimporra, de magar les 19’30 hores del prósimu xueves, día 1 de xunetu. Nel actu fadráse llectura pública de la obra ganadora.
 
El ganador
 
Pablo Rodríguez Medina, (L'Entregu, 1978) ye llicenciáu en Filoloxía Hispánica y Especialista en Filoloxía Asturiana. Escritor billingüe, les sos obres, tanto nuna como n'otra llingua, algamaron delles distinciones tanto a nivel asturianu y estatal.

Destaquen premios como'l Xosefa Xovellanos, pola novela ‘L'Arna de San Atanás’, el Teodoro Cuesta del añu 2006 pol poemariu ‘Aires de mudanza' o'l de creación lliteraria de l'Academia de la Llingua Asturiana por ‘Les vueltes, toles vueltes’.

Combina tamién dellos xéneros: la narrativa, con obres como ‘Los paraísos perdío’s o ‘Ente semeyances’; la poesía, con poemarios como ‘Nel dialeutu del grisú’, ‘Tiempu d'esiliu y povisa ayeno’ y ‘Los desconocedores del agua’ (Premiu Asturies xoven de Poesía); y el teatru, con obres como ‘Martema. Historia d'una guerra, retratu d'unes culpes’ y ‘Orbaya’ (Premiu de teatru de l'Academia de la Llingua Asturiana). En castellán tien publicao obres como ‘Desbandada’, ‘El desorden en los vientos’, ‘La arena tras tus ojo’s y ‘Los laberintos del humo’.
 

Contador Estadistiques