Central Llechera aprueba 3,11 millones d'euros de beneficios

L'asamblea de compromisarios de Central Llechera Asturiana, Sociedá Agraria de Tresformación, SAT, aprobó por mayoría, les cuentes del 2009, con 3,11 millones d'euros de beneficios.

De los 110 socios presentes na xunta, d'un total de 116 -faltaron 6 compromisarios-, 62 votaron a favor, lo que representa'l 57,31%; 47 en contra, el 41,56% y ún astúvose, el 1,13%, según indicaron en nota de prensa dende la compañía.

L'asamblea tamién ratificó la partida ente los socios d'un millón ochenta mil euros, a cuenta de los beneficios llograos, lo que representa un abonu de 0,30 céntimos d'euru por euru nominal de participación na SAT; esto ye, cada sociu va llograr una paga, que se va abonar llueu, equivalente al 30% del capital que tenga invertíu na compañía.
  
Central Llechera Asturiana, SAT, llogró nel pasáu exerciciu del 2009 unos beneficios de 3,11 millones d'euros. El balance de la SAT produzse dientro del contestu de crisis económica "qu'afecta a tola Unión Europea y, particularmente, al sector llecheru comunitariu", destaca la empresa.
  
Coles mesmes, calca en que los cuentes del 2009 fueron "bien positives" pa Central Llechera Asturiana cuidao que "globalmente, los beneficios triplicaron los llograos nel 2008". "Mientres que nel 2009, el superávit algamó los 3,11 millones d'euros, nel 2008, les ganancies averáronse al millón d'euros", recordó nel escritu.
  
L'asamblea tamién aprobó destinar 156.000 euros al Fondu Social de la SAT, 236.000 euros al pagu d'intereses y 1,6 millones d'euros a acutes. A lo último, l'asamblea ratificó'l cambiu de la redacción de los estatutos aprobaos na xunta celebrada l'añu pasáu. Esta votación ufiertó 63 votos favorables, 3 contrarios y 44 astenciones.