TPA algama 25.000 hores d'emisión

|

TPA algama güei 25.000 hores de programación. Dende la canal solliñen el compromisu cola información, l'audiencia del 7,6% y “la presencia del asturianu en gran parte de la parrilla”.

TPA, anguaño A7, primer canal de la televisión pública, entamó la so emisión regular el 9 de xunu de 2006. La canal llogró xubir la so audiencia dende'l 3% en xunu de 2006 hasta'l 7,6% n'avientu de 2009. Les retresmisiones deportives de Champions League, Lliga BBVA y F1, llogren los meyores índices d'audiencia xuntu colos espacios de ‘TPA Noticias’.

El 28 d'abril d’esti añu, el partíu Barça-Inter de Milan rexistró'l récord d'audiencia na hestoria de la cadena, con 226.000 espectadores y una cuota de 54,9%. El fútbol de Segunda División B tamién llogró máximos d'audiencia'l 11 d'ochobre de 2009 col partíu ente'l Real Sporting de Xixón B y el Real Uviéu, con 79.000 espectadores y una cuota del 28,7%.

Dende TPA apunten que casi’l 37% de la programación son espacios informativos y d'actualidá. Asina, destaquen les tresmisiones del Día d'Asturies, l'alderique sobre l'estáu de la rexón, la entrega de los Premios Príncipe d'Asturies y la demostración aeronaval de les Fuerces Armaes en Xixón.

Tresmisiones informatives qu’algamen altos picos d’audiencia. Como exemplu, la primer edición de 'TPA Noticias' xuntó a 50.000 espectadores de media'l pasáu 8 de setiembre, Día d'Asturies, y lideró l'audiencia con un 27,1% de share. El 24 d'ochobre del 2009 la cadena autonómica volvió bater un récord mientres la visita de los Príncipes d'Asturies a Sobrescobiu por cuenta de la entrega del Premiu al Pueblu Exemplar, con una media de 59.000 espectadores y una cuota del 47,1%.

Del mesmu mou, el programa ‘Conexión Asturias’, espaciu d'información y actualidá, lideró l'audiencia na so franxa horaria, con un 18,6% de share el 14 d'avientu de 2009, xornada na que'l programa prestó especial atención al día depués del fregáu ente el siguidores del Real Sporting de Xixón y el Sevilla Fútbol Club, y la ñevada que sufrió'l país
.
La cadena autonómica emitió 25.000 hores a parrilla vista (de 08:00 a 24:00 hores) dende l'entamu de la so emisión regular. El 35,32% d'estes hores (8.831) foron emitíes en direuto. La información ocupó’l mayor porcentaxe en tola programación, el 37% de les hores emitíes, mientres que les series estraxeres suponen el 14% de la emisión, mesmu porcentaxe que tien el cine.

Darréu, señalen l’espaciu dedicáu a la cultura y la educación (6%), onde menten el concursu ‘Asturias en 25’. Llueu vendría’l deporte, col 5%, mientres que los infantiles queden col 3,6% y los documentales col 2,6%, siendo la música (0,8%) el xéneru que menos espaciu tien dientro de la TPA. El restu de hores, menos del 10%, lo califiquen como espacios dedicaos al entretenimientu.

L’asturianu “ta presente”

L’últimu puntu del que falen dende la RTPA (depués d’información, fútbol, deportes y cultura y entretenimientu) ye un apartáu onde citen la situación del idioma del país na televisión pública.

Señalen que l’asturianu ta presente en gran parte de la parrilla, destacando los espacios ‘Camín de Cantares’, ‘Pieces’ y ‘Nós’. Amás de ‘Al Aldu’, programa que s’estrema en cinco secciones y qe s’emite de llunes a vienres.

Sicasí, dende TPA y a pesar de dedicar un apartáu pa falar d’ello, nun señalen el porcentaxe d’hores emitíes n’asturianu, nin l’audiencia d’estos programes. Reseñable ye que’l primer programa que citen, ‘Camín de Cantares’, llegara algamar nel añu 2008 una audiencia media de 28.000 espectadores, con un 30,2% de share y asitiando a la TPA como la televisión más vista mientres la emisión del programa presentáu por Xosé Antón 'Ambás'.

Nun falen tampoco nesta estaya de ‘Sones’, gales musicales que la TPA emite tolos domingos de nueche, nin de tresmisiones especiales como la misa de San Pedrín de la Cueva dende Sariegu, la Xunta Estraordinaria de l’ALLA o’l Premiu al Meyor Cantar.
 
Darth Vader: "Yo soi to pá"
La Xunta entama una campaña pidiendo más asturianu na RTPA
Tres años d’asturianu na TPA
Más de 600 persones piden en Facebook la F1 n’asturianu
La XDLA reclama a Pérez Ornia y a Consuelo Vega qu'actuen pa que la RTPA use la toponimia asturiana
 
TPA2 nun llega al 1% d’audiencia
La TPA nun tien presupuestu pa una segunda canal

 

 

Contador Estadistiques