Una Xunta Xeneral enllena d’idioma vivo

La presidenta de la Xunta Xeneral presentó la llectura de testos n’asturianu como un de los actos más importantes de la Selmana, onde'l costumismu desató la risa de los presentes.

María Jesús Álvarez, que presentó l’actu n’asturianu, entamó dando la bienvenida y recordando la figura de Xosé Antonio García, l’autor al que se-y dedica la Selmana de les Lletres. Foi la primera de les 26 personalidaes que lleyó’l so poema; ‘Pelophilax Perezi’ de Marisa López Diz.

Darréu, llegó’l turnu de los conseyeros. Primeru la Conseyera de Cultura, Mercedes Álvarez, con un poema de Xuan Bello, “un poeta que punxo a Panicieros nel mapa d’España”, depués el d’Educación, José Luis Iglesias Riopedre, qu’escoyó ‘Prestaríame volver tastiar las zrezas’, un poema “en bable occidental” de Carmen Guardado Parga. Finó’l turnu de los conseyeros Noemí Martín, responsable de Bienestar Social y Vivienda, col conocíu poema de Berta Piñán ‘Una casa’.

L’escritor homenaxáu na Selmana de les Lletres foi lleíu polos senadores socialistes José Manuel Cuervo Fernández y Carmen Sanjurjo González, y la diputada d’IU Emilia Vázquez. El mesmu autor que recordaron Vicente Gotor, rector de la Universidá d’Uviéu, Avelinu Viejo, Síndicu Mayor, la presidenta de l’Academia de la Llingua, Ana Cano, María Antonia Pedregal, xefa del Serviciu de Política Llingüística, y Diana González, conceyala de cultura de Mieres, d’onde yera Xosé Antonio Garía.
 
Mientres, el responsable de Cultura d'Uviéu, José Suárez Arias-Cachero, escoyó al so vecín de Felechosa Pablo Texón, comentando que l'añu en que ñació l'escritor, asoleyaron el primer cartel de les fiestes n'asturianu, faciéndolo en comuña con una muyer qu'anguaño yera diputada del PSOE, "amosando que l'asturianu ye más una ferramienta qu'une qu'un arma que separa".
 
La Directora Xeneral de Política Llingüística, Consuelo Vega, optó por un testu de José Manuel Valdés, “escritor y llibreru de vieyo del Campillín”. Mientres, la vicepresidenta 1ª de la Xunta Xeneral, Diana Camafeita, d’IU, escoyó un fragmentu de ‘L’iviernu y les roses’ d’Elisabet Felgueroso. Darréu, la secretaría 1ª, la socialista Servanda García Fernández, lleyó un testu humorísticu n’eonaviegu d’Aurora García Rivas, ‘A vida que nun se ve’.

L’eonaviegu tamién foi escoyíu pol responsable de promoción del asturianu, Luis Casteleiro Oliverios, y por Alfonso Román, diputáu del PP. Mientres que’l so compañeru de partíu Emilo Pérez Cueva lleyó un cuetu popular recopiláu por María Xosefa Canellada. Roberto Colunga optó pol lleonés Roberto González-Quevedo, asina como los socialistes María Pilar Alonso y Benamín López González optaron por Pablo Texón y Vicente García Oliva, respeutivamente.

El conservador Joaquín Aréstegui punxó la nota underground a la xornada con un fragmentu de la obra de teatru ‘País’ de Dolfu Camilo, onde se fala de sindicalistes apoltronaos acostumaos a los prostíbulos. La diputada en Madrid Pilar Fernéndez Pardo lleyó un testu del so compañeru popular Humberto Gonzali, que taba nel actu al igual qu’otros escritores, como Pablo Texón, Xuan Vello o Vanessa Gutiérrez, autora escoyida pola diputada popular nel Congresu Carmen Rodríguez Maniega.

El costumismu de ‘El neñu de Xuanón’ d’Emilio Fernández-Corugedo, bisgüelu del Director de la Oficina de Rellaciones cola Xunta Xeneral, Gonzalo Olmos, espertó les rises del públicu. Al igual que’l testu propiu de Manuel Fernández de la Cera, presidente del Conseyu de Comunidaes Asturianes, la 'Homilía del cura vieyu de Santolaya de Tinéu'.

Tolos asistentes pudieron sentir como al presentar el testu, la secretaría 1ª de la Xunta Xeneral, la socialista Servanda García Fernández, natural d’A Veiga, falaba ensin nengún problema n’eonaviegu. Lo mesmo col asturianu occidental de la diputada socialista María Pilar Alonso, o’l del director de la Oficina de Rellaciones cola Xunta Xeneral, Gonzalo Olmos.

En castellán presentaron el so testu José Luis Iglesias Riopedre, los populares Arestegui y Pardo, y el Rector de la Universidá d’Uviéu, Vicente Gotor.

Una botella d’agua enllena de tierra vivo

La presidente de la Xunta Xeneral, María Jesús Álvarez, presentó tamién el llibru ‘Una botella d’agua enllena de tierra vivo’, verso recoyíu nel poemariu de Xosé Antonio García ‘Cuartetu de la criación’. El llibru, editáu pola Xunta Xeneral, repartióse ente los presentes y tien cuarenta y ún rellatos curtios d’otros tantos autores, que trataron el problema de la situación ambiental del planeta coincidiendo col Añu Internacional de la Biodiversidá.