Suatea denuncia los problemes pa dar y recibir clases d'asturianu

Suatea pide la creación de la especialidá d’asturianu y denuncien la inesistencia del idioma n’Infantil y l’incumplimientu de la Llei, “la oficialidá sería la solución”.

Pa Suatea, agora colos nuevos titulos reglaos d’asturianu en Filoloxía y Maxisteriu, l’alumnáu universitario tien la opción de formase y los estudios d’asturianu algamen l’estatus d’estudios reglaos “colo que pue dase una bona calidá na educación del alumnáu en cuasi toles etapes”. Sicasí, apunten qu’hai que denunciar qu’esta situación nun tien la so correspondencia nel terrén de la homologación y reconocimientu d’esos estudios.

“Tol esfuerzu de formación namás mos habilita p’aspirar a ser profesoráu interín, pues nun esiste’l reconocimientu la Especialidá d’asturianu; nun se crearon los puestos d’estes especialidaes nes plantiyes orgániques, nun s’ufierten n’emplegu públicu los puestos reales esistentes y nun se cubre nengún d’esos puestos por concursu de tresllaos”, señalen.

Pa Suatea tolos partíos representaos na Xunta Xeneral tienen la culpa de la situación; “la competencia pa crear la especialidá ye del Estáu que ratifica la decisión tomada pol gobiernu de la Comunidá Autónoma".

Poro, esixen la creación de la especialidá de llingua asturiana y gallego-asturianu, la inclusión de los puestos d’estes especialidaes nes plantiyes orgániques, la convocatoria d’oposiciones y el concursu de tresllaos.

La situación n’Infantil

El sindicatu tamién denuncia “l’abandonu dafechu y de fechu” que fai Educación na planificación escolar de l’asturianu y el gallego-asturianu n’Infantil, “una etapa fundamental y crítica nel aprendimientu llingüísticu y la so continuidá”.

Recuerden que nun se va a crear la mención en llingua na formación del profesoráu d’Infantil y que nel currículu d’esti grau nun apaez nomada en denyuri la nuestra llingua, “nin se prevé (como nel casu l’Inglés) la intervención del especialista de Primaria nesta etapa”.

Amás, señalen que nun s’afala a la matriculación nin s’inspecciona afayadizamente’l cumplimientu obligatoriu de la ufierta nesta etapa. “Estos caberos díes dellos centros pidieron ampliar a Infantil la ufierta educativa d’asturianu y negóse-yos per parte l’alministración encontándose nel nuevu currículu d’esta etapa”.

Suatea denia l’incumplimientu de la Llei d’Usu al nun garantizar la enseñanza de la llingua, poro, esixie a la Conseyería Educación la formación llingüística básica n’asturianu y gallego-asturianu del profesoráu nel grau de maestru n’Educación Infantil,  y la igua del currículu d’Infantil, “qu’apaeza nomada la nuestra llingua y esplicitaos los conteníos curriculares que la homologuen coles otres llingües del currículu”.

Amás, soliciten que mentanto nun se dean estes condiciones, se tomen transitoriamente les midíes organizatives afayadices en materia personal, material y presupuestario que garnaticen la enseñanza del nuestru idioma nesta etapa.
 
Solución; oficialidá

Apunten qu’esi mesmu incumplimientu y abandonu súfrese tamién en Secundaria y Bachiller “onde nun se respeta la voluntariedá del so deprendimientu”. Amás, señalen que na FP, les escueles d'Adultos, Escueles Oficiales d'Idiomes y estudios universitarios non llingüísticos o relacionaos cola educación, la enseñanza la llingua asturiana o'l gallego-asturiano nun se da.

Pa Suatea tolos problemes del idioma del país nel ámbitu educativu, “con delles correspondencies nel social”, tendríen solución cola declaración d’oficialidá del asturianu y el gallego-asturianu. “Los fechos mos confirmen que'l ruin marcu normativu d'anguaño nun garantiza los derechos llingüísticos y menos cuando l'alministración los interpreta restrictivamente amosando la so falta de querencia hacia'l nuestru idioma y los sos falantes”.

“Aprovechamos pa convidavos a participar con nosotros nos movimientos sociales qu'afalen l'algame d'esti finxu y a asistir a la manifestación que tolos años se convoca'l día 7 de mayu col mesmu envís”, apunten pa finar.