Más de 200 escolinos d’Avilés homenaxen a Xosé A. García

Más de 200 escolinos de los IES de la Comarca d’Avilés participaron esta mañana nes Xuntes d’Escolinos, onde los mozos y moces fixeron un homenaxe a Xosé Antonio García.

Inaguró la xornada de les VII Xuntes d’Escolinos nel Auditoriu d’Avilés el conceyal de cultura, Román Álvarez, qu’animó a tolos mozos presentes a conservar la cultura asturiana pa que nun se pierda, “tenemos una llingua propia y esperemos que los vuestros fíos puean deprendela como faceis vosotros”.

Depués llegó’l momentu de que los escolinos de los institutos d’Avilés amosaran lo que llevaben preparando selmanes nes clases de llingua. Abrió la representación l’intitutu Carreño Miranda, que representó un cuentu de Milio’l del Nido y poemes de la segunda xeneración del Surdimientu, época lliteraria a la que pertenez Xosé Antonio García, l’autor homenaxáu nesta Selmana de les Lletres.

Darréu, los mozos qu’estudien ESO nel Institutu de Salinas interpretaron dellos versos del escritor mierense recoyíos nel so llibru ‘Memories d’un home muertu’.

Llueu, llegó’l turnu del IES de La Magdalena, cola representación de ‘Y eso que taba morriendo’ de Monserrat Garnacho y la llectura de cinco poemes de ‘Cuartetu de la creación’ de Xosé Antonio García.

A dos mozos de La Magdalena toco-yos la parte más reivindicativa del actu, finando’l poema de Roberto González-Quevedo ‘Una historia’, que fala de la perdida de la identidá del país, col puñu n’altu. Pa que’l momentu reivindicativu nun quedara ehí, un mozu interpretó’l cantar ‘La Danza’ de Dixebra, acompañáu a la gaita por un compañeru, que tamién tocó ‘Xota Castañón’.

Depués xubieron al escenariu los escolinos de Piedrasblancas, que fixeron una pequeña obra onde tres mozes, antroxaes de Xosé Lluis García Arias, Xuan Xosé Sanchéz Vicente y Lluis Xabel Álvarez aldericaben sobre lo que diba ser ‘Conceyu Bable’, falaben sobre la necesidá d’una academia de la llingua, la presencia del idioma nes escueles y de la posibilidá d’un Estatutu d’Autonomía onde l’asturianu fora oficial. A la fin, depués del aconceyamientu, García Arias invitaba a los collacios a tomar una sidra.

Darréu más teatru y la música de cuatro escolinos de Piedrasblancas, cuatro gaiteros y una pandereta qu’animaron a los más de 200 mozos qu’enllenaben l’Auditoriu de la Casa de Cultura d’Avilés mientres una gala que s’allargó hora y media.

Llueu, les cuatro maestres que prepararon colos escolinos toles representaciones xubieron al escenariu a recoyer un regalu, mientres los sos alumnos aplaudíen pa que la so profesora fora la más llaudada.

A la fin, l’agrupación Xuntanza interpretó delles pieces de música tradicional de Mieres, onde ñació Xosé Antonio García, y ente cantar y cantar cuntaben a los neños como enantes n’Asturies nun había discoteques y el baille yera’l únicu xeitu pa lligar que teníen los mozos.

Mañana, nel mesmu llugar a les 10.30 de la mañana, tóca-yos el turnu a los neños d’educación primaria, cola participación de más de 500 escolinos de nueve colexos de la Comarca d’Avilés.