Espaciu y Tiempu de la Llingua Asturiana

Cronoloxia

Esta cronoloxía pretende facer un repasu a feches nes que pasaren acontecimientos que de d'una o otra manera supunxenon un fitu na hestoria de la llingua d'Asturies. Esta ye la nuesa clasificación que pol mesmu calter de la mesma nun dexa de ser arbitraria. Sicasí pue valir pa facese una idea de la evolución de la nuesa llingua nel tiempu.

1839: "Colección de Poesíes"

Xosé Caveda y Nava (1796-1882) asoleya esti añu la primer recompilación de lliteratura asturiana de la hestoria, "Poesías selectas en dialecto asturiano", que servirá de revulsivu pal despertar de la conciencia llingüística de finales del XIX. Fermín Canella amplíala y redítala nel añu 1887.

1845: Tiadoro Cuesta
El xoven Tiadoro Cuesta (1829-1895) con namás 16 años llee en públicu en 1845 el so primer poema n'asturianu. Col tiempu, con obres como "El protomártir asturiano FR. Melchor García Sampedro",convertiráse nel poeta más conocíu, prolíficu y celebráu de la final del sieglu XIX.
1861: "Evanxeliu según San Mateo"

El Principe Lluis Lluciano Bonaparte encarga-y a Manuel Fernández de Castro (1834-1905), obispu, poeta y traductor al asturianu d'otres obres relixoses, facer una traducción al asturianu d'esti Evanxeliu. La obra publícase en Londres en 1861.

1869: "Gramática Asturiana"
Xuan Junquera Huergo (1804-1880) remata en 1869 la so Gramática Asturiana. Esta obra foi conocida por munchos de los sos contemporáneos pero nun ve la forma impresa hasta 1991, publicada pola Academia de la Llingua Asturiana. "Por el estudio detenido que de él [l'asturianu] se haga podrán nuestros literatos aplicarle con suma corrección fácilmente a todo género de composiciones, e ilustrándole y enriqueciéndole convenientemente perpetuarle, evitando la decadencia y ruina a que camina".
1875: "El viaxe del tíu Pachu "El Sordu" a Uviedo"

Enriqueta González Rubín (1832-?) espubliza "El viaxe del tíu Pachu "El Sordu" a Uviedo", primer amuesa de novela curtia n'asturianu. L'autora ye la primer narradora de la lliteratura asturiana.

Pages

Coneyería d'Educación y Cultura
Espaciu y Tiempu de la Llingua Asturiana
--Araz.net, © 2010. Tolos derechos reservaos.