Espaciu y Tiempu de la Llingua Asturiana

Tas en Espaciu y Tiempu > La llingua asturiana > Introducción >Escolarización

Escolarización

Panorama

Una de les reivindicaciones cimeres del movimientu de recuperación llingüística n'Asturies foi, siempre, la entrada nes escueles de la llingua d'Asturies. La campaña que nos años 70 estró les muries d'Asturies coles pintaes de 'Bable nes escueles', frutió nel añu 1984 cuando 10 centros pilotos entamen coles clases d'asturianu. Daquella p'acá otros centros de deprendimientu secundariu y primariu foron incomporándose al procesu. Sicasí el movimientu de recuperación llingüísticu considera'l procesu insuficiente y lentu por demás.

El cursu con un númberu d'alumnos mayor foi'l 95/96, con 19.737 escolinos en 150 centros de Primaria. En Secundaria llegóse a 4.669 alumnos nel 2007/2008. De magar esa fecha, la situación vieno empeorando, principalmente por falta de planificación y males condiciones pal ensiñu, anque na década del 2000 los datos d'escolarización presentaron una meyora casique constante en Primaria. Sicasí, la llingua sigue presentando datos d'escolarización muncho más baxos en Secundaria, onde compite con otres asignatures al ser optativa.

Dende mediaos de los 80 dellos conceyos entamen, les más de les veces cola cooperación de la Conseyería de Cultura, cursos d'asturianu. Na Universidá, depués d'un procesu llargu y enllenu de problemes, l'asturianu entamó a estudiase como cursu d'Estensión Universitaria na Facultá de Filoloxía y na Escuela Universitaria de Maxisteriu, creándose dempués los títulos propios d'Espertu y Especialista en Llingua Asturiana. Estos cursos desaniciaránse nel añu 2010 yá que, cola adecuación de la Universidá d'Uviéu, al nomáu Procesu de Bolognia, la Filoloxía Asturiana entra per primer vez dientro de la enseñanza reglada como una minor de 48 creitos.

L'algame de la Filoloxía Asturiana como enseñanza reglada ye una reivindicación de vieyu del movimientu asturianista. La so aprobación nel 2008 nun tuvo lloñe de polémica tres que l'equipu rectoral de la Facultá de Filoloxía propunxera la creación d'una maior (120 creitos) dientro de les titulaciones de grau que nun salió alantre pola propuesta del profesor Félix de Castro, que presentó una enmienda onde s'afitaba qu'una titulación d'asturianu "politizaba" la Universidá. L'aprobación de la enmienda pola Xunta de la Facultá fizo que l'asturianu quedara fuera de la enseñanza universitaria, polo que la Decana, Ana María Cano, dimitió del so cargu. Meses dempués, el Decanu en funciones, José Antonio Martínez, presentó na Xunta de la Facultá una propuesta de minor como solución al conflictu. Tres una nueva votación, la filoloxía asturiana foi aprobada como una minor de 48 créitos y 8 asignatures, ye dicir, estúdiase como complementu a otra filoloxía.

La polémica volvió surdir en 2009 na Escuela de Maxisteriu cuando la so directora, Gloria López Téllez, presentó una propuesta d'estudios, qu'a la fin nun foi aprobada, onde nun s'inxería l'asturianu. Nuna segunda votación decidióse votar por separáu la mención d'asturianu y les otres propuestes, aprobándose una especialidá d'asturianu que cuntara con 30 créitos. Tamién s'ufre'l Máster de Secundaria, únicu que capacita de manera llegal pal enseñu de Llingua Asturiana y Gallego-asturiano nes escueles.

N'otru sen, l'Academia de la Llingua Asturiana entama tolos años en branu unos cursos a enseñantes y públicu en xeneral. Trátase de la Universidá Asturiana de Branu (UABRA), nome que recibe dende'l 2010 dende'l so treslláu d'Ibias a la Escuela-Hogar de Cangas del Narcea. Los cursos que s'ufierten son el ‘Cursu elemental de Llingua Asturiana’, el ‘Cursu Avanzáu de Llingua Asturiana’ y el ‘Cursu de Gallego-asturiano (primeira fase)', de dos selmanes de llargor, a los qu'hai que sumar los 'Cursos d'Afondamientu Cultural y Llingüísticu', d'una selmana de llargor, que traten de delles cuestiones venceyaes cola cultura y la llingua del país. En total, mientres los 15 díes que dura la UABRA axúntense en Cangas 170 persones, de les que 120 son alumnos, la mayor parte d'ellos en réxime de pensión completa, anque dalgunos de la zona acuden a durmir a les sos cases.

 

Programa "Nós" (TPA): L'asturianu nes escueles

Programa "Nós" (TPA): L'asturianu nos institutos

Programa "Nós" (TPA): Cursos de branu d'Ibias

Entrada de la LOMCE

Cola aplicación de la Llei Orgánica de Meyora de la Calidá Educativa (LOMCE) nel cursu 2014-2015, el Gobiernu d'Asturies tien la potestá pa incluyir la materia de Llingua Asturiana y Gallego-asturiano según decida. Nun primer momentu, el reglamentu nun recoyía la posibilidá d'estudiar llingües non oficiales, pero les protestes de l'Academia de la Llingua Asturiana, sindicatos educativos y coleutivos sociales llevó a la conseyera Ana González a solicitar que tamién incluyera aquelles llingües que, pese a nun tener calter oficial, sí tien reconocimientu xurídicu.

D'esta forma, en Primaria l'asignatura de Llingua Asturiana y Gallego-asturiano, nel so ámbitu, apaez nel currículu como materies de llibre configuración, cola alternativa única de Cultura Asturiana, con 1,5 hores llectives selmanales. Esta situación tamién llevantó crítiques al considerar insuficiente la presencia de la materia, que pasa de voluntaria a optativa, compitiendo con Cultura Asturiana, un bloque de conocimientos que, poles sos carauterístiques, l'asturianismu considera que debería ser tresversal en tol currículu asturianu. D'igual forma, considérase que la situación afayadiza pal idioma sería 2 hores selmanales y el so usu como llingua vehicular pa Ciencies Sociales y Naturales.
 
Plan Pilotu pa facer l'asturianu vehicular en Primaria
 

Nel cursu 2017-2018, con Genaro Alonso como conseyeru, púnxose en marcha’l Plan Pilotu esperimental de Promoción del Usu del Asturianu en cuartu de Primaria, nel que participaron seis centros del país: La Carriona-Miranda (Avilés), El Bosquín (L’Entregu), Xentiquina (Lieres), El Cotayu (Carbayín), Bernardo Gurdiel (Grau) y Santiago Apóstol (Mieres). Los escolinos d’estos colexos dieron una materia de les árees de Ciencies Sociales, Ciencies Naturales, Educación Artística o Educación Física n’asturianu, en total una hora selmanal, siempre de manera voluntaria, amás de l’asignatura propia de Llingua Asturiana y Lliteratura.

Esti proyeutu caltúvose’l cursu viniente pero, magar la bona esperiencia, nin se retomó nin s'estendió al restu de centros escolares.

Entrada de la LOMLOE

En payares del 2020 apruébase la Llei Orgánica 3/2020, de 29 d’avientu, pola que se modifica la LOE del 2006 (LOMLOE), nomada nel so momentu Llei Celaá, al ser ésta la ministra que la impulsó. Ésta deroga a l’anterior Llei Orgánica pa la Meyora de la Calidá Educativa (LOMCE) aprobada baxo mandatu del popular José Ignacio Wert nel 2013 y aplicada nel cursu 2014-2015.

Esta norma nueva sigue teniendo cuenta a les llingües non oficiales con reconocimientu xurídicu y presencia na educación pa recoyer casos como’l de la llingua asturiana, quedando agora afitada nel bloque d'asignatures de llibre configuración autónomica y posibilitando la reorganización del enseñu en tolos etapes: el Gobiernu d’Asturies podría aumentar la carga horaria y el pesu curricular. Sicasí, l’aplicación de la mesma, que tien llugar nel cursu 2022-2023, dexa la situación de la materia práuticamente igual.

N’Infantil l’asturianu nun apaez nel currículu, mentes qu’en Primaria caltiénse como optativa compitiendo con Cultura Asturiana. El númberu d’hores selmanes sigue siendo 3 per ciclu, esto ye, 1,5 hores per cursu.

Tamién permanez como optativa en Secundaria, onde pierde una hora en cuartu, y en Bachilleratu, onde gana 2. Hasta esti cursu na ESO la materia contaba con 2 hores selmanales, menos en cuarto que contaba con 3; agora pasen los cuatro cursos a tener 2, esto ye, piérdese 1 al baxar de 9 a 8 en tola etapa. Les materies coles que compite Llingua Asturiana y Lliteratura son una segunda llingua estranxera, Cultura Clásica, Dixitalización Aplicada y Proyeutu d’Entamamientu Social o Empresarial, teniendo qu’escoyer una de les cinco.

En Bachilleratu había hasta la LOMLOE 1 hora selmanal qu’aumenta agora hasta les 3 en caún de los dos cursos, cifra entovía perbaxo de les 4 hores que tenía l’alumnáu d’asturianu nel pasáu. Les optatives coles que compite Llingua Asturiana y Lliteratura I (que, recordamos, cuenta con 3 sesiones) en primer cursu son una asignatura de modalidá non cursada (4), Anatomía Aplicada (3), El Llegáu Clásicu (3), una segunda llingua estranxera I (3), Teunoloxíes Dixitales Aplicaes I (3), Proyeutu d’Investigación Integráu I (1), Recursos Enerxéticos y Sostenibilidá (1) y una materia propuesta pol centru (1), tando l’alumnu obligáu a escoyer 4 sesiones nuna materia o combinando.

Yá en segundu, caltiénense les asignatures d’otres modalidá y una escoyida pol centru, amás de les que tienen segunda parte como Llingua Asturiana y Lliteratura, y incorpórense Sicoloxía y Sociedá (3) y Xestión de Fontes Documentales y Comunicación (1).

Enseñu Primariu

 

Evolución de la escolarización n'asturianu na escuela pública

 
CURSU CENTROS MAESTROS ALUMNOS
84-85 6 6 1351
85-86 30 30 3052
86-87 54 50 4076
87-88 92 73 6550
88-89 133 92 10470
89-90 147 117 12850
90-91 181 126 15826
91-92 114 118 16557
92-93 116 114 16865
93-94 121 113 16389
94-95 136 138 18179
95-96 150 145 19737
96-97 155 155 15182
97-98 166 106 14578
98-99 173 106 14238
99-00 180 106 similar
00-01      
01-02   335 17.981
02-03      
03-04      
04-05     15.896
05-06      
06-07 221   15.305
07-08 226   16.740
08-09 231   17.156
09-10 232  

17.763

10-11   188  
11-12      
12-13 226 166 17.298
13-14   200 17.497
14-15   200 17.727
15-16   189 17.601
16-17   186 17.411
17-18 201 265 17.082
18-19     17.102
19-20     16.466

 

Enseñu secundariu

 
CURSU CENTROS PROFESORES ALUMNOS
88-89 7 7 215
89-90 12 12 326
90-91 5 5 84
91-92 8 9 184
92-93 6 7 170
93-94 7 7 212
94-95 12 9 388
95-96 10 10 400
96-97 15 15 651
97-98 14 15 956
98-99 14 15 772
99-00 13 13 Similar
00-01     1.063
01-02     2.172
02-03      
03-04      
04-05 67   3.706
05-06 69   3.702
06-07 95   4.458
07-08 102 72 4.669
08-09 108   4.592
09-10 105   4.183
10-11   76 3.500
11-12      
12-13   63 3.000
13-14   70 3.003
14-15   70 3.220
15-16   75 2.852
16-17   73 2.971 (+303 Bachilleratu)
17-18 78 81 3.065 (+306 Bachilleratu)
18-19     3.118 (+368 Bachilleratu)
19-20     3.809 (+426 Bachilleratu)

Universidá
 

Anguaño, dende l'añu 2010 cola entrada del Plan Bolognia, la Facultá de Filosofía y Lletres, surdida pola fusión de les antigües facultaes de Filoloxía, Filosofía y Xeografía y Historia, ufre un minor de llingua asturiana de 48 creitos y 8 materies, polo que la Filoloxía Asturiana entra nel enseñu regláu como complementu a otra filoloxía.
 

La capacitación pal enseñu de l'asignatura de llingua asturiana na Educación Secundaria Obligatoria y Bachilleratu úfrela la Universidá d'Uviéu al traviés del Centru Internacional de Postgráu dientro del Máster Universitariu en Formación del Profesoráu d'Educación Secundaria Obligatoria, Bachilleratu y Formación Profesional de 60 créditos ECTS, na so especialidá d'asturianu.


Asina mesmo, la Facultá de Formación del Profesoráu y Educación, surdida de la fusión de les antigües Escuela Universitaria de Maxisteriu y la Facultá de Ciencies de la Educación , ufre la mención n'asturianu de 30 creitos y 5 materies.
 

1. Minor de llingua asturiana.
 

(Facultá de Filosofía y Lletres)

Con esta titulación, l'asturianu entra nel enseñu regláu. De 48 creitos y 8 materies, ye de llibre escoyeta pa los alumnos que lu pueden cursar dientro de cualquiera de los graos de Filoloxía.

-Llingua Asturiana I: normativa, competencia y usu.

-Llingua Asturiana II: normativa, competencia y usu.

-Llingua Asturiana III: fonética y fonoloxía.

-Llingua Asturiana IV: morfoloxía.

-Llingua Asturiana V: sintaxis.

-Llingua Asturiana VI: léxicu.

-Historia de la Llingua Asturiana.

-Historia de la Filoloxía Asturiana.
 

2. Máster d'asturianu.
 

(Centru Internacional de Postgráu)

Compónse de 60 creitos y capacita pal enseñu de l'asignatura de llingua asturiana na Educación Secundaria Obligatoria y Bachilleratu.
 

3. Mención n'asturianu.
 

(Facultá de Formación del Profesoráu y Educación)

Anguaño ye l'únicu mediu que capacita de manera llegal pal enseñu de Llingua Asturiana na Educación Primaria. De 30 creitos, ta dividía en 5 materies.

-Llingua Asturiana I.

-Llingua Astruriana II.

-Historia de la Lliteratura Asturia.

-Didáutica de la Llingua Asturiana I.

-Diáutica de la Llingua Asturiana II.
 

--------------------------------------------------------------------------------------
 

Hasta la llegada del Plan Bolognia, l'asturianu tenía esta presencia na universidá:
 

1.Títulu d'Especialista en Filoloxía Asturiana.
 

(Facultá de Filoloxía)

Esta titulación empobinábase a los llicenciaos en cualisquier rama de Filoloxía y capacitaba al profesoráu pa impartir l'asignatura de Llingua Asturiana na Educación Secundaria. Los 56 creitos de que constaba (560 hores) encadamábense nes siguientes asignatures:

-L'Asturianu y los otros Dominios Llingüísticos Peninsulares .
-Llingua Asturiana I .
-Hestoria de la Llingua Asturiana I .
-Sociollingüística del Asturianu .
-Llingua Asturiana II .
-Hestoria de la Llingua Asturiana II .
-Testos Asturianos Medievales .
-Testos Llingüísticos Asturianos (modernos y contemporáneos).
-Lliteratura Asturiana

2.Títulu d'Espertu en Filoloxía Asturiana.

(Escuela Universitaria de Maxisteriu)

Esta titulación empobinábase a los mayestros y diplomaos n'E.X.B. y capacitaba al profesoráu pa impartir l'asignatura de Llingua Asturiana na Educación Primaria. Los 42 creitos de que constaba (420 hores) encadarmábense nes siguientes asignatures:

-Llingua Asturiana I
-Llingua Asturiana II
-Hestoria de la Lliteratura Asturiana
-Didáutica de la Llingua Asturiana I
-Didáutica de la Llingua Asturiana II
-Hestoria de la Llingua Asturiana
 

Pruebes de certificación de llingua asturiana


Nel añu 2019 el Gobiernu aprobó’l decretu qu'afita los niveles de competencia nel usu de la llingua asturiana y que regula les pruebes de certificación correspondientes. Éstes tán adaptaes al Marcu Común Européu de Referencia pa les Llingües, un estándar européu que s’usa nos países del Conseyu d’Europa y que sirve pa midir el nivel de comprensión y espresión oral y escrita nun idioma determináu.

Asina, gracies a esti protocolu común pue valorase de manera oficial nos 47 estaos que participen el conocimientu en delles llingües como l’inglés, l’alemán, el francés, l’italianu, el portugués, el chinu mandarín, el catalán, el gallegu o l’eusquera, ente otres, tres pasar un esame que convoquen gobiernos o instituciones como’l Cervantes, nel casu del castellanu. El Gobiernu d’Asturies afitó cinco niveles pal nuesu idioma (básicu A1, básicu A2, intermediu B1, intermediu B2 y avanzáu C1) y prepara anguaño otru decretu pal gallego-asturiano.

L’esame cuenta con una parte escrita, que tolos aspirantes faen el mesmu día y consiste en trés pruebes: producción y coproducción de testos escritos, comprensión de testos orales y comprensión de testos escritos. Llueu, por pareyes o tríos nun día concretu, han d’afrontar otres dos orales: producción y coproducción de testos orales y mediación.

Pa ser aptu ye necesario superar les cinco pruebes y tener una media mayor de 6. Les puntaciones son de 0 a 10, arredondiando a la décima.

El 3 d’ochobre del 2020, con retrasu obligáu por cuenta la pandemia de COVID-19 –la primer convocatoria yera pal 21 de mayu–, desendolcóse na Facultá de Formación del Profesoráu y Educación de la Universidá d’Uviéu, nel campus de Llamaquique, la parte escrita de les pruebes de certificación de llingua asturiana, de nivel intermediu B2. Cerca de 800 persones matriculáronse pa sacar esti títulu, pero la llende de 500 places pa esta edición por temes loxísticos llevó a la celebración d'un sortéu, nel que salió les dos primeres lletres del apellíu por 'xs' en sentíu de la 'z' a la 'a'.

La Comisión Permanente Educación-Cultura que s’encargó d’esta prueba repitió nel 2021 la prueba B2 y convocó'l nivel superior C1, enllenando tamién les 300 places ufiertaes pal nivel intermediu.

-2020: prueba de nivel intermediu B2
-2021: prueba de nivel intermediu B2 y avanzáu C1
-2022: prueba de nivel intermediu B2 y avanzáu C1
 

Niveles de l’Academia de la Llingua


Hasta la llegada de les pruebes oficiales de certificación, la única prueba de llingua asturiana yera la prueba de conocencia de l’Academia de la Llingua Asturiana (ALLA), que se convocaba tolos mes de xineru y mayu. Ésta yera de nivel básicu y contaba con dos partes, escrita (dictáu, torna, exercicios gramaticales y redaición) y oral (alderique con un esaminador).

P’algamar un certificáu de nivel mayor, habría de facer nos cursos de l’ALLA, anguaño Universidá Asturiana de Branu (UABRA), el ‘Cursu Elemental de Llingua Asturiana’ y el ‘Cursu Avanzáu de Llingua Asturiana’. Éstos consten de 60 hores llectives mientres dos selmanes de clases que se desenlquen estos años últimos en Cangas del Narcea a primeros d’agostu.

Miranda de l Douro

 

El mirandés ye asignatura voluntaria nos colexos de les Tierres de Miranda. Yá en 1986 s’entamó a dar en dalgunes escueles fuera del horariu escolar. Cola declaración d’oficialidá del mirandés la llingua entro nes escueles y agora son trés los mayestros que dan lhengua mirandesa a 450 escolinos. Anguaño, tase trabayando na igua d’un manual d’enseñu de la llingua, yá qu’hasta agora yera’l mayestru’l que facía’l material formativu. Los colexos de Miranda, amás, desendolquen actividaes de sofitu a les clases pa fomentar l’usu de la llingua, pero ensin cuntar con nengún sofitu oficial.

Lleón

 

Nel cursu 2008-2009 el lleonés entró en 16 escueles de la capital lleonesa como materia estraescolar pa neños y neñes de quintu y sestu cursu de Primaria. La matriculacion algamó los cien escolinos. El Conceyu de Lleón y otros de la provincia tamién ufren cursos p’adultos en collaboración con asociaciones de defensa del idioma como El Fueyu y El Toralín. Estos cursos, estructuraos en seis niveles, son impartios por profesores capacitaos gracies al títulu de 'Monitor de Llingua Llïonesa' qu’otorga la Universidá de Lleón, anque nun ye un títulu con caráuter oficial.

Sicasí, nestos cursos, tanto los que s’ufren en escueles como los d’adultos, utilízase una normativa estremada de la de l’ALLA. Inclús la propia presidenta de la institución, Ana María Cano, ufiertó la normativa académica pa llevar el lleonés a les escueles, pero la llamada Asociación de Monitores en Llingua Llïonesa cargó contra l’ALLA y acusó a la institución d’intromisión, afitando amás que lleonés y asturianu nun son la mesma llingua.

A pesiar de too, tamién se tienen entamáu en dalgún conceyu de Lleón (como ye’l casu de Ponferrada) cursos d’asturianu, o asturllionés, p’adultos siguiendo la normativa académica y cuntando cola collaboración de la propia institución.
 

Cola ayuda de

Coneyería d'Educación y Cultura

Espaciu y Tiempu de la Llingua Asturiana
--Araz.net, © 2010. Tolos derechos reservaos.
Contador Estadistiques